Meeqqap innarluutillip ikiorserneqarnissaa pillugu suliaq sakkortuumik isornartorsiorneqartoq

Anaanaq meeraalu siusinnaarluni erniusoq kommunimit ikiorserneqarnissaminnut ukiut pingasut sinnerlugit utaqqisinneqarput.
Assi © : KNR
januaarip 24-at 2019 07:27
Nutserisoq Simon Uldum

Tamannalu pissutigaugu Qaasuitsup Kommunia aamma kommuni Qaasuitsup Kommuniata siorna avinneqarnerata kingornatigut suliamik tigusisoq Ombudsmandimit sakkortuumik isornartorsiorneqarput.

Suliaq aallartippoq arnaq panimmi tapersersortitut ikiortilerneqarnissaanik Qaasuitsup Kommunianut 2013-imi septemberimi qinnuteqaateqarmat. Tamatumunnga atatillugu ilaatigut oqaatigaa panini siusinaarluni erniusimasoq qaratsamigullu aanaartoorsimasoq. Panialu ukiut pingasut sinnerlugit qaangiummata - februaarimi 2017-imi - tapersersortitut ikiortilerneqarpoq.

Ukiut pingasut suliarinninnermut atorneqarsimanerisa sivisuallaarnera isornartorsiorneqarpoq. Ombudsmandip suliaq pillugu oqaaseqaammini ilaatigut oqaatigaa piffissaq suliamik suliarinninnermut atorneqartoq akuerineqarsinnaanngitsoq isorisarialerujussuarlu pineqartoq - suliassaqarfimmi tassani sulisussaaleqisimaneq apeqqutaatinnagu.

Qaasuitsup Kommunia aamma kommuni Qaasuitsup Kommuniata avinneqarnerata kingornatigut suliamik tigusisoq Ombudsmandip suliamik suliarinninnerminut atatillugu oqaaseqaateqartippai. Piffissap suliamik suliarinninnermut atorneqartup sivisussusia innarluutilinnut tunngasuni sulisussaaleqinermik pissuteqartoq kommunit taakku marluullutik oqaatigaat. Tamannali utoqqatsissutaasinnaanngitsoq, oqaatigineqarpoq.

Ombudsmandi aammattaaq inerniliivoq suliami annertuutigut sunniuteqartunik kukkussuteqartoqarsimallunilu sumiginnaasoqarsimasoq. Taamaattumillu Inatsisartut suliaq pillugu ilisimatinneqarsimapput.