Tilioq innarluutilinnik isumaginninnermi nakkutilliinermit nalunaarusiaq pillugu: Inunnik soqutigisaqannginnermik takutitsivoq
![](/sites/default/files/styles/image_934x467/public/article_images/anja_hynne_nielsen.jpg?itok=Dkrq5CWt)
- Ingasappoq. Innarluutillit Avannaata Kommuniani qanoq ajornartorsiortiginersut qanorlu sumiginnarneqartiginersut takullugu annilaarnarpoq. Kisianni tamanna Tiliumit qangali uparuartaratsigu aamma tupaallannanngilaq.
Tiliumit inuit innarluutillit oqaaseqartartuat Anja Hynne Nielsen nakkutilliinermit nalunaarusiaq qaammammi matumani saqqummertoq pillugu taama oqarpoq.
Isumaginninnermut naalakkersuisoqarfimmit nakkutilliinermik ingerlatsivik Avannaata Kommuniani innuttaasut innarluutillit atugaannik misissuivoq.
Iliuuseqarnissamut pilersaarutinik, innarluutillit siunnersuisoqatigiivinik, nakkutilliinermik, illersuisunut neqeroorutinik amigaateqarnerit ajornartorsiutaasut tassani erserpoq.
Atuarlugit annilaarnartut, oqaaseqartartumulli tupaallannanngitsut.
Inunnik soqutigisaqannginnermik takutitsilluinnartoq
Isumaginninnermut naalakkersuisoqarfimmit nakkutilliinermik ingerlatsivik inunnut innarluutilinnut Avannaata Kommuniani suliani misissugassanik 25-nik taamungaannaq toqqaavoq.
Sulianilu toqqagaani 25-usuni ataasiinnarluunniit sumiginnaaffiusimanngitsoq inatsisinillu unioqqutitsiffiusimanngitsoq erserpoq.
Innuttaasullu pineqartut ilaat sumiinnersorluunniit allaallumi toqusimasoq kommunip ilisimasimanngikkaa aamma erserpoq.
Sulialli kukkuluttorfiunerat puiguinnaasarnerillu soqutigisaqannginnermik ersersitsilluinnartut, Anja Hynne Nielsen isumaqarpoq:
- Nalunaarusiami allaaserineqartut soqutiginninngitoqarneranik ersertitsipput. Kisianni aamma suliamik naammassinninnissamut amigaateqarneq. Kommunini atorfillit ataasiakkaat sapinngisartik tamaat sulisut qularutiginngilara. Tamannali qulaaninngaanniit salliutinneqanngitsoq erseqqippoq, oqaaseqartartoq oqarpoq nangillunilu.
- Kommunimit pingaartinnginneqangaarmat, allaat suliani ataasiakkani sumiginnaasoqarsinnaavoq. Inuilluunniit sumiinnersut naluaat. Inunnik soqutigisaqannginnermik takutitsivoq.
Nunarput tamakkerlugu ajornartorsiutaasoq
Suliani toqqakkani takussutissanik amigaateqarnermut iliuusissatullu pilersaaruteqannginnermut unammillernartut ajornartorsiortitsinerujartorput.
Unammillernartullu tamakkua inunnik innarluutilinnik isumaginnittoqarfinniinnaanngitsoq aammali isumaginnittoqarfinni allani aamma ajornartorsiortitsinerujartorput.
Taamaannerali suliat kukkuluttorfiunerannik taamaallaat aallaaveqanngitsoq erseqqissassallugu, Anja Hynne Nielsenip pingaartippaa:
- Taamaannera suliat kukkuluttorfiunerannik taamaallaat ajoraluartumik aallaaveqaannanngilaq. Innuttaasunut ataasiakkaanut aamma kingunipiloqartartoq inuttaasunik oqaloqateqarnitsinni misissuinitsinnilu takusarparput. Tassa suliat kukkuluttorfiuinnanngillat, inuilli ikiorneqarnissamik pisinnaatitaaffeqaraluarlutik ikiorneqartanngitsortaqarput, taanna oqarpoq.
Aamma Avannaata Kommuniani nakkutilliinermit nalunaarusiaq kommunit sinnerini nalunaarusianut assinguvoq.
Taamaammat kommunimik ataasiinnaarmik uparuaasoqassanngilaq, ajornartorsiutulli annerujussuartut maannalu iliuuseqarfigineqartariaqartutut isigineqartariaqarluni:
- Ajoraluartumik tupaallannanngilaq. Aamma nalunngilarput Avannaata Kommunia kisimi taama ajornartorsiorfiunngitsoq. Kommunini allani aamma taama ajortigisunik ajornerusunilluunniit pisoqartarpoq, Anja Hynne Nielsen oqarpoq nangillunilu:
- Kommuni akisussaasuulluinnarpoq, kommunilu sumiginnaasuuvoq. Kisianni annerusumut ilaaginnarpoq. Tassalu qulaaninngaanniit sumiginnaanermut. Tamanna Inatsisartunit Naalakkersuisuniillu salliutinneqanngilaq. Ukiorpassuarni ajutoorfiuvoq, inuit innarluutillit oqaaseqartartuat oqarpoq.