MIO Tiliorlu inatsisissatut siunnersuut pillugu: Tarnikkut nakuuserneq malunnarneq ajorpoq, aserorterisarpoq unitsikkuminaallunilu
Tarnikkut nakuuserneq timikkut nakuusernermut naleqqiunneqarnissaannut inatsisissatut siunnersuut Inatsisartuni ullumi siullermeerneqarpoq.
Inatsisissatut siunnersuummi partiit tamarmik tapersigaanni qanimut attaveqarfigisap assersuutigalugu aapparisap imaluunniit ilaquttap tarnikkut nakuuserneranut pineqaatissiissuteqartoqarsinnaanissaa pineqarpoq.
Suliniaqatigiiffiit inatsisissatut siunnersuummut atatillugu inatsisissatut siunnersuut qanoq pingaaruteqartiginersoq isumaqarnerlutik oqaatigaat, tarnikkummi nakuuserneq timikkut nakuusernertulli innarliisinnaatigivoq.
Meeqqat immikkut ittumik eqqugaasartut
MIO-p oqarnera naapertorlugu inatsisissatut siunnersuut pingaaruteqarpoq, tarnikkummi nakkuserneq nakuuserfigineqartunut annertuumik sivisuumillu kingunerlutsitsisarmat.
Tassunga atatillugu meeqqat immikkut ittumik eqqugaasartut isiginiarnissaat pingaaruteqarpoq, meeqqammi tarnikkut nakuuserfigineqartut inummut tarnikkut nakuusertumut atalluinnartuusarmata.
Meeqqat oqaaseqartartuat, Aviâja Egede Lynge, tusagassiuutinut nalunaarummi ima oqarpoq.
- Qinikkavut sakkortunerpaamik kajumissaarpakka akisussaaffitsik tigoqqullugu, meeqqallu innuttaasullu allat illersulissallugit tarnikkut nakuusertarnermut, tassami tarnikkut nakuusertarnerup kingunerisartagai annertoorujussuarmik kingunerluttartoq nalunngereerparput, taamaammat inatsisissatut siunnersuutip akuerineqarnissaa akuereqqullugu kajumissaarpassi, meeqqat oqaaseqartartuat oqarpoq.
Pinerluttaalisitsineq pingaaruteqartoq
Suliniaqatigiiffiup tarnikkut nakuusernermut pinerluttaalisitsinerulernissaa 2019-imi nipituuliorluni suaarutigiuaannarsimallugu MIO-p tusagassiuutinut nalunaarummi erseqqissaatigaa.
Tarnikkut nakuuserneq Danmarki ukioq taanna pinerluttaalisitsinermut ilanngunneqarpoq, nunatsinnilu pinerluttuliornermut inatsimmi aalajangersakkani assingusumik peqalernissaanut periarfissat misissorneqarnissaat innersuussutigineqarpoq.
Tamatuma saniatigut nunarput Naalagaaffiit Peqatigiit Meeqqat pillugit isumaqatigiissutaani artikel 19 malillugu meeqqanik tamanik tarnikkut timikkullu nakuusernermut illersuinissamut pisussaaffeqartoq, suliniaqatigiiffiup eqqaavaa.
- Tarnikkut nakuuserneq pinerluttaalisitsinermut ilanngunneqarneratigut, ersinngitsumik inunnik aqutsineq aamma ajortumik sunniuteqaqataavoq, taamaammat alloriarnermik eqqortumik tigusilluta inuiaqatigiit ajunnginnerusut tungaanut ingerlalerpugut, meeqqallu tamarmik inerisarsinnaanngorlutik atugarissaarnerulersinnaallutillu, Aviâja Egede Lynge oqarpoq.
Tarnikkut nakuuserneq ulorianarlunilu unitsikkuminaatsoq
Innarluutillit illersuisoqarfiata Tiliup inatsisissatut siunnersuut tarnikkut nakuusertoqannginnerulersitsinissaa neriuuteqarfigaa.
Tarnikkut nakuuserneq meeqqap imminut pingaartinneranut inuunerminnilu imminut isumagilluarsinnaaneranut kingunerluuteqangaatsiarsinnaasoq misissuinerit arlallit takutippaat.
Tamanna Tiliup tusagassiuutinut nalunaarummi erseqqissaatigaa.
Tarnikkut nakuuserneq ulorianartuuvoq unitsikkuminaatsuugami kiisalu sunniutai arriitsumik erseriartuaartarmata ajoqutaarujussuarsinnaallutillu. Taamaammat tamanna meeqqamut inummulluunniit pineqartumut annertuumik sunniuteqarnerluttarpoq. Taamaammat, tarnikkut nakuusernerup pinerlunnertut isigineqalernissaa peqqutissaqarluarpoq, Tiliumi innarluutillit illersuisuat, Anja Hynne Nielsen oqarpoq.
Politikerit piviusumik nassuerutiginninnissaat neriuutigigaa
Anja Hynne Nielsenip tamatuma saniatigut Innarluutillit pillugit isumaqatigiissummi artikel 16-mi malittarisassat inatsisillu inuit innarluutillit atornerlunneqarnissamut, nakuuserfigineqarnissamut angerlarsimaffimmilu atornerluisoqarnissaanut illersorsuisut nunatta isumagisussaagai oqaatigaa.
- Neriuppugut tarnikkut nakuusernerup pineqaatissiissutaasinnaalernissaa pingaaruteqartoq politikerit nassuerutigiumaaraat, Anja Hynne Nielsen oqarpoq.
Inatsisissatut siunnersuut akuerineqassappat Kalaallit Nunaanni Politiit Danmarkimi politiit suleqatigalugit tarnikkut nakuuserneq pillugu suliaq qanoq isumagineqartarnissaannut ilitsersuusiussapput.
