Danmarkimi sakkortuumik innarluutillit isumassuivinniissimasut naalagaaffimmit utoqqatserfigineqassasut

Danmarkimi sakkortuumik innarluutillit isumassuivinniitillutik kinguaassiuutitigut atornerlunneqarlutillu isumagineqarluarsimanngitsut naalagaaffimmit maajip arfineq-pingajuani pisortatigoortumik utoqqatserfigineqassapput.

Isumaginninnermut, ineqarnermut utoqqarnullu ministereqarfik tusagassiorfinnut taama nalunaarpoq.

Utoqqatserfigineqarnissaat siorna apriilimi qulaajaasoqarneranik aallaaveqarpoq.

1933-p 1980-llu akornanni isumaginninnikkut immikkut sullitat amerlasuut nakuuserfigineqartarsimasut qulaajaanermi paasineqarpoq.

Isumaginninnermut ineqarnermullu ministeri, Pernille Rosenkrantz-Theil, tusagassiorfinnut nalunaarummi taama oqarpoq.

- Sakkortuumik innarluutillit isumassuivinniissimasut utoqqatserfigineqarnissaminnut sivisuumik utaqqisimasut naalagaaffik sinnerlugu utoqqatserfigisussanngorakkit nuannaarutigaara, taanna oqarpoq.

Inuit 27.500-t missaanniittut ukiuni taakkunani isumassuivinniissimapput, taakkunanngali suli inuusut qasserpiaanersut ilisimaneqanngilaq.

Ministeri Danmarks Forsorgsmuseumimi Svendborgimiittumi utoqqatsissaaq.