Naalagaaffiup sakkortuumik innarluutillit isumassuivinniissimasut utoqqatserfiginiarai
- Atugartuussutsimi inunnik isumassuineq ullutsinni taamanikkullumi isumaammat taakku utoqqatserfigineqassapput. Taamanili killuanik pisoqarpoq, danskit isumaginninnermut ineqarnermullu ministeriat Pernille Rosenkrantz-Theil (S) oqarpoq nangillunilu:
- Sorpassuit aamma inatsisit taamanikkut atuuttut naapertorlugit inerteqqutaapput, naalagaaffiulli inunnik innarlitsaaliiniarnera iluatsissimanngilaq.
Sakkortuumik innarluutillit isumassuivinniissimasut naalagaaffimmit pisortatigoortumik utoqqatserfigineqassasut, Astrid Krag (S) isumaginninnermut utoqqarnullu ministeriutilluni 2022-mi septembarimi aamma nalunarpoq.
Danmarkimi Socialdemokratit, Venstrekkut Moderatillu tamatuma kingornali naalakkersuisoqatigiilerput, taakkulu naalagaaffik pisortatigoortumik utoqqatsileersaarnersoq maannamut nalunaarutiginngilaat.
Naalagaaffik pisortatigoortumik utoqqatsissanersoq utoqqatsissannginnersorluunniit suli isummerfigisimanngikkitsik, Pernille Rosenkrantz-Theil sapaatiummamut allaat oqarpoq.
Taanna TV 2 Øst-imut taama oqarpoq. Naalagaaffiup pisortatigoortumik utoqqatsernissaa neriuutigigini, arnaq 92-inik ukiulik arnanik innarluutilinnik isumassuivimmi Sprogømiittumi najugaqarnikoq TV 2 Øst-imut siusinnerusukkut oqarpoq.
Arnanik innarluutilinnik Sprogømi isumassuivimmiissimasut naartusinnaajunnaarsinneqarsimasortaqarput. Soorlu inuit silassorissusaannik uuttuummi 75-it inorlugit silassorissusillit, tusilartut, tappiitsut, innarluutillit, oqalunniarnermik ajornartorsiutillit noqartartullu naartusinnaajunnaarsinneqarsimasunut ilaapput.
Naalagaaffik qaammatit tulliuttut ingerlaneranni pisortatigoortumik utoqqatsilersaartoq, danskit isumaginninnermut, ineqarnermut utoqqarnullu ministereqarfiat ilisimatitsivoq.
Ministerip Pernille Rosenkrantz-Theilip oqarnera naapertorlugu sakkortuumik innarluutillit isumassuivimmiissimasut taarsiiffigeqqullutik danskit naalagaaffiat eqqartuussivilersuutilereerpaat, suliarli taanna suli aalajangiiffigineqanngilaq.
Danskit nukappiaqqat meeqqat angerlarsimaffianni Godhavnimiissimasut, danskit ministeriunerata Mette Frederiksenip (S) 2019-imi pisortatigoortumik utoqqatserfigai. Nukappiaqqat taakkua 1946-p 1976-illu akornanni Godhavnimiitillutik kinguaassiuutitigut atornerlunneqartarsimapput.
Kalaallit meerartaanni misileraatigineqarlutik 1951-imi Danmarkiliartitaasimasuni 22-usuni arfinillit suli inuusut, Mette Frederiksenip allakkatigut utoqqatserfigai.
