Folketingimi ilaasortani nunatsinneersut Folketingimi ammaanersiorluni sisamanngornermi oqallinnermi oqalugiaramik ministeriuneq Mette Frederiksen (S) unnersiutigeqaat.Assi: Scanpix

Folketingimi ilaasortani nunatsinneersut: Mette Frederiksen sapiissuseqaqaaq

Aki-Matilda Høegh-Damip Aaja Chemnitzillu danskit naalakkersuisui socialdemokratiusut nunatsinnik ukiuni kingullerni pingasuni ukkataqarnerannik nersualaaqaat. Ingammik nunasiaasimanermut tunngasunik ukkassisimammata.

Meeqqanut misileraataasimasunut utoqqatserneq. Danmarkip nunattalu oqaluttuarisaanerannik qulaajaanissamut misissuineq. Spiralilersuisoqarsimaneranik assuarinninneq. Nunasiaasimanermi kukkussuteqarsimanerat pillugu oqalugiarnerit.

Folketingimut qinersinissaq nalunaarutigineqareeraluarpoq. Taamaakkaluartoq Folketingimi ilaasortani nunatsinneersut Folketingimi ammaanersiorluni sisamanngornermi oqallinnermi oqalugiaramik danskit naalakkersuisuisui socialdemokratiusut nersualaaqattaarpaat.

Tassa Inuit Ataqatigiinneersup Aaja Chemnitzip Siumumeersullu Aki-Matilda Høegh-Damip oqalugiarnerminni ministeriuneq Mette Frederiksen (S) ministerillu allat nunatsinnik ukkataqarnerannut qutsavigaat.

AAMMA ATUARUK Inuit Ataqatigiit Folketingemut qineqqusaartitassatik isertuukkaat

-  Naalagaaffiup, aamma Socialdemokratit aqutsisuisa, iliuuserisaat isumallualersippaatigut. Taamaammat ministeriuneq ministerillu allat qamannga pisumik qutsavigaavut. Suleqatigiinnitsinnut sulianullu naammassisanut qujavugut. Kalaallit isaanniit isigalusi sullerippusi, Aaja Chemnitz (IA) oqarpoq.

Taanna spiralilersuisoqarsimaneranik taavalu nunatta Danmarkillu sorsunnersuup kingullermiit maannamut oqaluttuarisaanerannik qulaajaanissanut tunngasunik aamma oqaaseqarpoq.

- Danskit qinigaaffimmi uani naalakkersuisui sapiissuseqartut arajutsisimanngilarput, pimoorussilluinnarlutillu sulinerannut qutsavigaakka, Aaja Chemnitz oqarpoq.

Siumut: Mette Frederiksenip neriullualersippaatigut

Aamma Socialdemokratit Folketingimi gruppiata ataatsimiinnerani peqataasartup Aki-Matilda Høegh-Damip Mette Frederiksenip nunatsinnik kingoraakkamininngarnit tupaallannanngitsumik nersorpaa.

- Ullumi ippassarmit pitsaaneruvugut. Qinigaaffiillu siuliinit pitsaaneruvugut. Tamanna nunatta malugusuutigaa. Ullut atukkavut siornarnit allaanerupput. Tassa maanna ministeriuneq siuliminit allaavoq. Tamanna qinikkatut, inuttut maluguusuutigaarput, Aki-Matilda Høegh-Dam oqarpoq.

AAMMA ATUARUK Nunatta Danmarkillu oqaluttuarisaaneranik qulaajaanissaq kinguartittoq

Taassuma Mette Frederiksenip Folketingimi marlunngornermi ammaanersiornermi oqalugiarnermini ilaatigut ima oqarneranut nersualaarpaa:

- Danmark nunasiaateqartuusimavoq. Minnerunngitsumillu Kalaallit Nunaat innarlersimavarput, iliuuseqarfigissallugit uagut danskit ajornakusoortitatsinnik. Pisulli pereerput. Tamaasalu isummerfigisariaqarpagut. Ajunngitsut ajortullu.

Aki-Matilda Høegh-Dam tamatumunnga atatillugu ima oqarpoq:

- Danskit naalagaaffiata ministeriunerullu Mette Frederiksenip neriullualersippaatigut. 

Inaarsagassat suli amerlasut

Poltikerilli kalaallit marluullutik nersualaarinnikkaluarlutik ataaseq atuutilersinneqartariaqartoq eqqaavaat: Tjenestemandit nunatsinni Danmarkimilu assigiimmik akissarsiaqartariaqartut. Naalagaaffimmi taakku akissarsiaasa tungaatigut maanna assigiinngisitsisoq, Aki-Matilda Høegh-Dam isumaqarpoq.

Aaja Chemnitz tamatumunnga tapersiivoq:  

- Politiinut tapisiat qaffaativinngornissaat qinersereernermi pingaarnertut inaarsagassatta ilagaat. Nunatsinni, Danmarkimi Savalimmiunilu politiit assigiimmik akissarsiaqarlerpata pitsaassaaq.

Danmarkimi kalaallit meerartaasa angerlarsimaffiup avataanut inissinneqarsimasut amerlavallaarnerannut pissutaasut naalagaaffimmit misissorneqartariaqartut nunatsinnilu isumaginninnermut aningaasaliisoqarnerusariaqartoq, IA aamma isumaqarpoq.