Inuit Ataqatigiit Folketingemut qineqqusaartitassatik isertuukkaat
Nunatsinni partiit annersaata, Folketingemullu manna tikillugu ilaasortaatitallip aappaata, Inuit Ataqatigiit, Folketingemut qineqqusaartitassai tamakkerlutik kikkuuppat aamma qassiuppat?
Tamanna Folketingemut qinersinissamut qaammataajunnaareeraluartoq partiip aaqqissussaanermut siulitaasuata tulliata maanna akiumanngilaa.
- Aalajangerpugut sapaatit akunnera tulliata aallartinnerani ataatsimoorussamik qineqqusaartitassagut qineqqusaarutissallu tusagassiortunik katersortitsinikkut saqqummiunniarlugit, Agathe Fontain KNR-mut oqarpoq.
AAMMA ATUARUK Nunatsinni partiit Folketingimut qineqqusaarnermi pingaartitaat makkuupput
Inuit Ataqatigiit sinnerlugit Folketingemut maanna ilaasortaq, Aaja Chemnitz, qineqqusaaqqissalluni nammineerluni nalunaareerpoq. Partiilli qineqqusaartitassai allat suli saqqummiutinngilai.
Agathe Fontainip qineqqusaartussat allat qassiunersut tusagassiortunillu ulloq suna katersortitsilersaarnertik aamma paasitikkusunngilaa.
Danmarkimi ministeriunerup, Mette Frederiksenip, danskit inatsisiliortuinut novembarip aallaqaataanni qinersisoqassasoq ippassaq nalunaarutigaa.
Aaja Chemnitz Nuummukaqqaassasoq
Kalaallit Nunaat sinnerlugu Folketingemut qinikkat ilaasortani 179-suni marlunnik issiavissaqarput. Nunatsinnilu partiit tamangajavimmik kikkunnik qineqqusaartitsissanerlutik ippassaq nalunaarput.
Inuit Ataqatigiit saqqummiussilerunik Aaja Chemnitzip Nuummi najuunnissaa pingaartikkaat, Agathe Fontain oqarpoq.
AAMMA ATUARUK Atassutip qineqqusaarnermi pingaartitaa: Peqqinnissaqarfik Naalagaaffimmut uterteqqinneqarli
Siumut aamma Folketingemut ilaasortaatitaqarpoq. Taanna ammaanermi oqallinnermut ullumi peqataavoq. Siumup sassartitassani ippassaq ilisaritippai, Folketingimut ilasortaq, qinigassanngorteqqittoq, Aki-Mathilda Høegh Dam, attaveqaatitigut peqataalluni.
IA-li taama periaaseqarnianngilaq.
- Assigiinngitsunik periuseqarpugut uagullu periuseq una toqqarparput, Agathe Fontain oqarpoq.
Tassalu qinersinissamut qaammataajunnaareersoq qinersisartut IA-p kikkut qineqqusaartinniarnerai sapaatit akunnerisa tullia nallertinnagu paasisinnaanngilaat.
Qinersiartortukitsoq
Folketingemut 2019-mi qinersisoqarmat Inuit Ataqatigiinnit, Aaja Chemnitz, Siumumiillu Aki-Matilda Høegh-Dam, Kalaallit Nunaannit qinigaapput. Aaja Chemnitz 5.669-nik, Aki-Matilda Høegh-Damilu 3.475-nik qinerneqarput.
Qinersisartulli taamani 41.344-sut 49,8 procentiinnaat qinersiartorput. Inatsisartunut 2021-mi qinersinermi qinersisinnaasut ikinnerullutik 41.126-ngaluartut 65,9 procentii qinersipput.
