Siumup siulittaasua: Sapaatit akunnerata naanerani isumaqatiginninnialerpugut
Inuit Ataqatigiit Nalerarlu naalakkersuisooqatiginnerat ajalusoortoq, Inuit Ataqatigiit Siumullu naalakkersuisooqatigiilersut ataasinngornermi nalunaarutigineqarpoq.
Siumup siulittaasua, Erik Jensen nassuiaavoq.
- Weekendimi isumaqatiginninniarnerit ulapputigivagut, ulluni kingullerni isumaqatiginninniarnernik ingerlappagut ineriartortillugillu ulumikkullu isumaqatigiissut tassa atsioqatigiissutigaarput, Erik Jensen KNR-imut oqarpoq.
AAMMA ATUARUK Naleraq naalakkersuisoqataajunnaartoq - IA Siumullu nalunaaqutaq aqqanermut tusagassiortunik katersortitsissasut
Nutaanik naalakkersuisooqatigiilerneratigut Naleqqakkut naalakkersuisooqataajunnaarput. Naleqqap siulittaasuata, Hans Enoksenip tamanna ataasinngornermi ullaap tungaani qulingiluanut paasivaa.
Naalakkersuisut siulitaasuat, Múte B. Egede Naleqqakkut allaffianukarluni naalakkersuisooqataajunnaarneranni oqariartortoq, Naleqqap siulittaasuat oqarpoq.
Akunnerit marluk qaangiummata Múte B. Egede Erik Jensenilu naalakkersuisooqatigiinnissamut isumaqatigiissummik atsioqatigiipput.
Naalakkersuisooqatigiilernerlu qinersineq naallugu atassasoq, Siumup naatsorsuutigaa.
- Ukiuni tulliuttuni qinigaaffiup sinnerani atasinnaasut upperalugit aamma naatsorsuutigilluinnaqqissaarsinnaallutigu taanna siunnerfik ingerlapparput, Erik Jensen oqarpoq.
Uranip inerteqqutinngortinnissaa IA Naleqqallu atuutilersippaat
Nunatsinni uranimik allanillu misissueqqaarneq, misissuineq piiaanerlu Inatsisartut siorna ukiaanerani ataatsimiinnerminni Inuit Ataqatigiit Naleqqallu inerteqqutinngortippaat.
Tassalu innuttaasut taasitinneqarnerisigut inatsit malillugu nunatsinni uranitalinnik misissuisoqaqqusaajunnaartoqarpoq.
AAMMA ATUARUK Ataatsimut isigalugu: Naalakkersuisut nutaat uku sulissutiginiarpaat
Inuit Ataqatigiit Naleqqallu Nunatsinni uranimik allanillu misissueqqaarneq, misissuineq piiaanerlu inerteqqutaalersimmagu taamani Siumut akerliuvoq.
Tusagassiortunik katersuutsitsisoqarnerani tassunga tunngatillugu Erik Jensen oqaaseqarusunngilaq, allannguisoqassappallu innuttaasut taasitinneqassasut taanna oqarpoq.
- Apeqqut taanna akissuteqarfigerusunngilara, Erik Jensen oqarpoq.
Hans Enoksen: Uukapaatitaasutut misigisimavugut
Siorna ukiaanerani ataatsimiittoqarnerani nunatsinni uranitalinnik misissuisoqaqqusaajunnaarneq Naleqqamiit Inuit Ataqatigiinniillu atuutilersinneqarnerata kingorna suleqatigiinnerat allanngortoq, Hans Enoksen oqarpoq.
- Tassa ersarissumik oqaatigaara aamma Naalakkersuisut siulittaasuannut atornerlunneqarluta uukapaatinneqarluta, illuatungilioqatigiikkatta ataqatigeeqqissaarnikuuvugut, kisianni piffissanngormat ungasillinikuupput.
- Urani allat partiit tamarmik peqataaffigiumanngisaat uagutsinnut aalajangeeqqataaffigiteriarlugu oqimaannerpaaq angugamikku "inuulluaritsi! Piffissaqanngilagut ilissinnut. " Taamatut paasineqarsinnaavoq.
AAMMA ATUARUK Naleqqap siulittaasua IA-kkunnik suleqateqarneq pillugu: Qanikkunnaariartornikuugatta
Naleqqap nammineq naliliinini akisussaaffigigaa, Múte B. Egede KNR-imut oqarpoq.
Naleqqakkut taamatut namminneq naliliinertik naliliinerissavaat. Uanga naalakkersuisooqatigisimasagut pitsaasumillu angusaqaqatigiinnissamik suleqatigisinnaasimagatsigit qujaffigiinnarusuppakka, Múte B. Egede oqarpoq.