Ataatsimut isigalugu: Naalakkersuisut nutaat uku sulissutiginiarpaat
Naalakkersuisoqatigiit ukioq ataasiunngitsoq naalakkersuisoqatigiipput. Aqaguagu qinersisoqarneranit ukioq ataaseq qaangiussimalissaaq, naalakkersuisoqatigiillu ullut qulit qaangiunneranni inissititerput.
Ullumili – qinersisoqarneranit IA-p qinigaangaatsiarneranit ukioq ataasinngungajalersoq – naalakkersuisoqatigiikkunnaarput. Naleqqap siulittaasuata Hans Enoksenip oqarnera naapertorlugu IA-p Naleraq naalakkersuisoqataajunnaaqquaa.
Siumullu naalakkersuisoqatiginialerlugu.
Siumut IA-lu Inatsisartuni atuuffinnit 31-nit amerlanerussuteqangaatsiarlutik 22-nik qinigaatitaqarput.
Partiit taakku marluk siornatigut naalakkersuisoqatigiinnikuupput – tassa 2016-imi Naleraq peqatigalugu naalakkersuisoqatigiillutik.
AAMMA ATUARUK Naleqqap siulittaasua IA-kkunnik suleqateqarneq pillugu: Qanikkunnaariartornikuugatta
Siumut aamma IA Inatsisartuni atuuffinnut 31-nut 22-nik qinigaatitaqarlutik maanna amerlanerussuteqarput.
Partiit taakku marluk siusinnerusukkut naalakkersuisoqatigiinnikuupput. Tamanna 2016-imit 2018-imut pivoq. Naleraq aamma naalakkersuisoqataavoq
2020-mi qinersisoqarpoq. Naleraq IA-lu naalakkersuisoqatigiinnissamik isumaqatigiissuteqarlutik 31-nit 16-inik qinigaatitaqarput. Atassut partiitut ikorfartortaavoq.
Atassut siorna novembarimi ikorfartortaajunnaarpoq.
Siumut maanna sisamanik Naalakkersuisuutitaqalissaaq. Siumuttaaq Inatsisartuni siulittaasuuffeqassaaq - Naleqqamit Hans Enoksen tassani ullumikkut siulittaasuuvoq.
Naleraq ullumikkumut pingasunik Naalakkersuisuutitaqaraluarpoq.
IA Siumullu naalakkersuisoqatigiinnissamut maanna atsioqatigiipput, partiillu taakku marluk akornanni isumaqatigiinngissut ataaseq annertuvoq: Tassalu uranimik piiaasoqarnissaa.
Maannali uranimillu nunatsinni piiaasoqarsinnaaleqqissappat innuttaasunut taasititsinermi amerlanerussuteqartut akuerseqqaassasut, inatsimmi allassimavoq,
Ima allassimavoq:
- Uranimut apeqqut ullumikkut atuuttutut sammiveqartinneqassaaq, apeqqullu allanngortinneqassappat aatsaat inuiaqatigiit taasinermikkut tamanna naqissusissavaat. Taasissutigineqassappallu innutaasut naammattumik illuinnaasiunngitsumillu qaammarsaavigineqarnissat avaqqunneqarsinnaanngilaq.
Siumup siulittaasua, Erik Jensen ullaap tungaani tusagassiortunik katersortitsisoqarnerani aperineqarpoq:
Siumut maanna qanoq iliussava? Siumut akuersiva imaluunniit innuttaasunut taasititsisoqarnissaanik sulissuteqarniarpa?
- Apeqqut taanna maanna uninngatikkallassavarput, Siumup siulittaasua, Erik Jensen oqarpoq.
Isumaqatigiissummi immikkoortut allat ilaat aaku:
- Parisimut isumaqatigiissut inuiaqatigiinnut qanoq sunniuteqassanersoq pillugu misissuiffigeqqissaarneqassaaq, siusinnerpaamillu ukiakkut 2022 Inatsisartunut aalajangiiffigisassanngorlugu tunniunneqassaaq.
- Utoqqaat soraarnerussutisiallillu atugaat pitsanngorsaavigineqassapput, tamannalu siunertaralugu inatsisit tamatumunnga tunngasut tamaasa qulaajarneqassapput. Tamanna kingusinnerpaamik upernaakkut 2023-mi Inatsisartunut tunniunneqassaaq.
- Kalaallit oqaasii Namminersorlutik Oqartussat ingerlatsineranni salliullutik inissisimassapput.
- Aalisarneq pillugu inatsisissaq inuiaqatigiit susassaqartullu qanimut suleqatigalugit sulineq nanginneqassaaq naammassineqarlunilu.
- Takornariaqarneq pillugu inatsisissaq nutaaq suliarineqassaaq, siunertaalluni nunami maani najugallit sutigut tamatigut salliutinneqarlutik inissisimanissaat qulakkeerneqassasoq.
- Namminersorneq pillugu Inatsit 2009-mi atuutsilersinneqartoq atuuffissaminut inissinneqassaaq suliap nanginneqarneratigut, inatsimmi periarfissiissutaasut atorlugit Inuiaat Kalaallit namminersulersimanerat annertusarneqassalluni, aningaasarsiorfigisinnaasatta annertusarneqarnissaat ilanngullugit.