Naleqqap siulittaasua IA-kkunnik suleqateqarneq pillugu: Qanikkunnaariartornikuugatta

Hans Enoksen, partii Naleqqap siulittaasua nassuiaavoq naalakkersuisooqatigisatillu IA-kkut ukiorli qanikkunnaariartornertik naalakkersuisooqatigiikkunnaarnermut peqqutaasimasoq.

- Naleraq Inuit Ataqatigiillu ukiorli immitsinnut ungasilliartuinnavinnikuuvugut, Hans Enoksen KNR-imut taama oqarpoq.

Partii Naleraq Inuit Ataqatigiillu siorna apriilip 16-anni naalakkersuisooqatigiittut atsioqatigiipput. Naalakkersuisoqaatigiinneq ukioq ataasingajak atareersorlu Naleraq naalakkersuisooqataajunnaartoq ullaaq ilisimatinneqarlutik Hans Enoksen oqarpoq.

- Naalakkersuisut siulittaasuata Muté B. Egedep ullaaq nal. qulingiluanut ilisimatippaatigut naalakkersuisooqataajunnaartugut. Tamanna sioqqullugu naalakkersuisooqataajunnaarnissatsinnik ataasinnguamilluunniit ilisimatinneqarnikuunngilagut. Hans Enoksen oqarpoq.

Siumut naalakkersuisooqataalerpoq

Naleqqakkunnut taarsiullugu Siumukkut naalakkersuisooqataalerput. Inuit Ataqatigiit Siumullu naalakkersuisooqatigiilersut naalakkersuisooqatigiinnermut isumaqatigiissummik atsioqatigiinnerat nal. aqqanermut tusagassiortunik katersortitsinermi pivoq.

Hans Enok oqarpoq Naalakkersuisooqatigiikunnaartut Naleqqakkut Inuit Ataqatigiillu naalakkersuisooqatigiittut ukiorli kingullermik ataatsimeeqatigiissimasut.

- Qasutissimagunarpagut, naalakkersuisooqatigiinnitsinni piuviusunngortikkusutarpassuagut pillugit uteriiserfigiuaratsigit. Siumukkut naalakkersuisoqatiginikuusatik naaperiaruminaattaqisut, kisiannili Inuit Ataqatigiit suli naaperiaruminaannerusut, partii Naleqqap siulittaasua Hans Enoksen taama oqarpoq.