Naleraq naalakkersuisoqataajunnaartoq - IA Siumullu nalunaaqutaq aqqanermut tusagassiortunik katersortitsissasut
Naalakkersuisut tusagassiortunik katersortitsiviannit nalunaaqutaq aqqanermut katersortitsisoqassaaq. Inuit Ataqatigiit aamma Siumut nalunaarummi paasissutissiipput.
Tusagassiortunik katersortitsineq sumut tunngasuteqarnersoq allassimanngilaq, KNR-illi paasissutissarsiai naapertorlugit partiit marluk akornanni naalakkersuisoqatigiinnissamik nutaamik sapaatip akunnerata naanerani isumaqatigiinniartoqarsimavoq.
Naleqqap siulittaasuata, Hans Enoksenip Naleqqap naalakkersuisoqataajunnaarnera KNR-imut uppernarsarpaa.
- Ilagiumanngippatigut pinngitsaalillugit ilagisinnaanngilagut.
Taassuma oqarnera naapertorlugu Naleraq naalakkersuisoqatigiinnit anisitaavoq.
Paasissutissalli Inuit Ataqatigiit siulittaasuata, Múte B. Egedep aamma Siumup siulittaasuata, Erik Jensenip uppernarsanngilaat.
Partii maanna naalakkersuisoqataasoq Naleraq tusagassiortunik katersortitsinissamut atsioqataanngilaq.
Siammasissumik isumaqatigiissuteqarniartut
KNR-ip naalakkersuisoqatigiinnissamut isumaqatigiissut pissarsiaraa. Tassanilu allassimavoq:
- Naalakkersuisooqatigiilersut isumaqatigiissutigaat qulequttani pingaarutilinni siammasissumik suleqatigeeriaaseq aallaavigalugu sulinerit inerlanneqassasut.
Inuit Ataqatigiit Nalerarlu siorna apriilip ulluisa 16-ianni naalakkersuisoqatigiinnissamik isumaqatigiissuteqarput, taakkuli ukioq ataaseq qaangiuttoq tassa naalakkersuisoqatigiikkunnaarput.
Inuit Ataqatigiit Siumullu aatsaat siullermeerlutik naalakkersuisoqatigiilinngillat. Partiit taakku marluk 2016-imi aamma Naleraq peqatigalugu naalakkersuisoqatigiipput.
