Siumut misissuisarfik pillugu kukkuluttornermut akuliuttoq: Ilungersunartutut isigaarput

Naalakkersuisup, Kirsten Fenckerip Aasianni misissuisarfimmut tunngatillugu paasissutissiinerlunnini ”oqartoornerunerarpaa”. Ajuusaangaatsiarporlu.

- Naalakkersuisut eqqortumik ilisimatitsisussaanertik pineqartumi ingerlatinngilaat, tamannalu Siumumit ilungersunartutut isigaarput.

Allatut oqaatigalugu illuatungiliuttut Aasianni misissuisarfik pillugu kukkuluttortoqarneranut akuliupput.

Pisoq peqqissutsimut naalakkersuisup, Kirsten Fenckerip (Naleraq) malunngormat tusagassiortunik katersortitsinermi Aasianni misissuisarfimmik pilersitsisoqarsimaneraaneranut tunngavoq. Tamanna ataasiaannarnani marloriarluni oqaatigaa.

AAMMA ATUARUK Kommunip naalakkersuisoq akerlileraa: Aasianni misissuisarfeqanngilagut

Tamatumali eqqortuunnginnera ajoqutaavoq. Aasiannimi misissuisarfimmik ammaasoqanngilaq.

Taamaallaat pisariaqalissagaluarpat misissuisarfimmik pilersitsinissamut suleqatigiittoqarsinnaanera pillugu Kommune Qeqertalimmut isumaqatigiissuteqartoqarpoq – tamannalu maannakkut pisariaqanngitsoq kommunip nalilerpaa.

Naalakkersuisoq ajuusaangaatsiartoq

- Eqqortunik paasissutissanik toqqammaveqarluta suleqatigiinnissarput pinaveersaartitsinissarpullu pisariaqarluinnarpoq, Siumumi politikkikkut siulittaasup tullia, Inatsisartunut ilaasortaq Vivian Motzfeldt oqarpoq.

- Nappaat pinaveersaartillugulu peqatigiilluta akiussagutsigu, eqqortumik ilisimatitsisarnissaq pingaaruteqarluinnartuuvoq. Tamatta tatigisariaqarparput, Naalakkersuisut oqariartuutaat eqqortumik isumaliutigineqarluarsimasunillu toqqammaveqarlutik aninneqartut.

AAMMA ATUARUK Naalakkersuisoq corona pillugu paasissutissat amigarnerat pillugu: Malinnaaniarnerput ajornakusoortorujussuuvoq

KNR-ip Kirsten Fencker pingasunngormat eqqunngitsumik paasissutissiinera pillugu apersorniaraluaraa, tamannali iluatsinngilaq.

Peqqinnissamut Naalakkersuisoqarfimmili ataqatigiissaarisumit mailikkut akissutersivugut:

- Naalakkersuisoq sinnerlugu tamanna oqartoornerusoq ilisimatitsissutigissavara, tamannalu ajuusaarutigingaarpaa.

Malittarisassat sukannersut aggustip 24-ata tungaanut atuuttut

Kirsten Fenckerip sapaatip akunnerani matumani suliamut tunngatillugu kukkuluttornera misissuisarfimmut kisimi tunnganngilaq.

Nunatsinni coronapasimik takutitsisartussaatitaaneq pingasunngornermi unnuap-qeqqanut atorunnaartussaagaluarpoq. Tamannali aggustip ulluisa 24-anut sivitsorneqarpoq. Malittarisassat sivitsornerannut nalunaarut Kirsten Fenckerimit atsiorneqarpoq – Naalakkersuisulli tamanna ulloq ataaseq sioqqullugu ilisimatitsissutiginngilaat.

Paasissutissiinerlunneq paasissutissallu amigarnerat Naalakkersuisunut tatiginnikkunnaarnermik kinguneqarsinnaasoq, Ilisimatusarfimmi tusagassiortunngorniarnut ilinniartitsisoq nunatsinnilu tusagassiuutit pillugit ilisimatooq, Signe Ravn Højgaard isumaqarpoq.

- Naalakkersuisut paasissutissiinissamik annertuumik ajornakusoortumillu suliaqarput. Killilersuutilli suut atuutsinneqarnersut innuttaasunut ataasiakkaanut paatsuunganarsinnaallutillu ersernerlussinnaapput, taanna KNR-imut oqarpoq

AAMMA ATUARUK Inuusuttut akornanni tuniluuttoqaraluartoq: Aasianni GUX ammarpoq

Aasianni tuniluutingaatsiartoqarnikuuvoq. Aasianni 3.000-t missaanni innuttaasoqartumi tunillatsissimasut piffissap ilaani katillugit 27-usimapput – kommunimi tassani tamarmi tunillatsissimasut maanna 15-iupput.

Killilersuutit sukannersut Aasiannut atuutsinneqarput: Inuit amerlanerpaamik 20-t sumiiffinni ataatsimoorsinnaapput kikkullu tamarmik tamanit orninneqarsinnaasuni qanermut assiaquteqaqqusaallutik.

Malittarisassat taakku aggustip ulluisa 24-annut atuupput.

Nunatsinni coronavirusi pillugu
killiffik

Uninngasut 0  
Toqusut 21  
Siullermik kapitissimasut 73%  
Aappassaa kapitissimasut 68%  
corona.nun.gl-imi kisitsit takukkit  
  Nutarterneqarpoq: 
  Apriilip 1-aat 14:00

corona_model_001.png

Nunatsinni coronavirusi pillugu

Coronavirusimik tunillatsinissaq pinaveersaaruk