Kommunip naalakkersuisoq akerlileraa: Aasianni misissuisarfeqanngilagut

Aasianni misissuisarfimmik pilersitsisoqarpoq.

Peqqissutsimut naalakkersuisoq, Naleqqamit, Kirsten Fencker ippassaq tusagassiortunik katersortitsinermi oqarpoq.

Tamanna eqqunngilaq. Aasianni misissuisarfimmik pilersitsisoqanngilaq – taamaallaat pisariaqassagaluarpat misissuisarfimmik pilersitsisinnaanermik suleqatigiittoqarsinnaaneranik Kommune Qeqertalimmut isumaqatigiissuteqartoqarpoq.

Kommuni ippassaq tusagassiortunik katersortitsisoqarnerata kingorna taama nalunaaruteqarpoq. 

Misissuisarfeqarnissaa maanna pisariaqartinneqanngitsoq

”Aasianni Kommune Qeqertalik misissuisarfimmik ataatsimik ammaanissaminut piareersimavoq, inuit amerlasuut misissortinnissaminnik pisariaqartitsilissagaluarpata”, kommuni ippassaq ualisoq tusagassiuutinut nalunaarummi allappoq.

Tamanna maanna pisariaqartinneqanngitsoq, kommuni nammineq naliliivoq.

AAMMA ATUARUK Akiuussuserneqarsimanissamut piumasaqaat nunarput tamakkerlugu aggustip 24-anut sivitsorneqartut

”Aasianni pisut massakkut aqunneqarsinnaasutut nalilerneqarput, taamaattumik kommunimit ikiuinissaq pisariaqartinneqanngilaq. Massakkut tunillatsissimasut amerleriaqqissagaluarpata aamma tuniluuttoqaqqilissagaluarpat kommunip napparsimmaviup eqqaanittoq Alleq atorneqarsinnaasutut neqeroorutigaa, illu taanna marlunnik isaariaqarpoq inunnit amerlasuunit iserfigineqarsinnaalluni.”

KNR-ip Kirsten Fencker attaveqarfiginiarsaraa. Kommunip misissuisarfimmik pilersitsisoqarsimannginneraraa sooq Aasianni misissuisarfimmik pilersitsisoqarsimaneraanersoq paasiniarparput.

Maannamulli akissutersiniarnerput iluatsinngilaq.

Aasianni coronamik tunillatsissimasut arriitsumik ikiliartortut

Aasianni coronamik tuniluuttoqarnera arriitsumik pitsanngoriartorpoq. Kommune Qeqertalimmi piffissami matumani tunillatsissimasut 15-iupput – taakkulu ikiliartorlutik.

- Aasianni piffissami matumani eqqissisimakannertoqarpoq, sulili tuniluuttoqaratarsinnaavoq, Henrik L. Hansen ippassaq tusagassiortunik katersortitsinermi oqarpoq.

Aasianni tuniluuttoqarnikuuvoq – piffissap ilaani tunillatsissimasut ataatsikkut 27-ullutik.

AAMMA ATUARUK Coronapas pisiniarfinni piumasaqaataassanngilaq: Malittarisassat unnuap-qeqqanit atuutilertussat aaku

Aasianni killilersuinerit sukannersut atuutsinneqarput.

Inuit amerlanerpaamik 20-t katereqqusaapput tamanillu ornigarneqarsinnaasuni assersuutigalugu pisiniarfinni, napparsimmavimmi, bussini taxanilu kikkut tamarmik qanermut assiaquteqassallutik.

Neriniartarfimmut imerniartarfimmulluunniit iserniartut tamakkiisumik akiuussutissamik kapitissimasariaqarput imaluunniit coronamik tunillatsissimannginnermut uppernarsaammik sivisunerpaamik akunnernik 48-nik pisoqaassusilimmik takutitsisariaqarlutik.

Malittarisassat taakku aggustip ulluisa 24-ata tungaanut atuutissapput.