Akiuussuserneqarsimanissamut piumasaqaat nunarput tamakkerlugu aggustip 24-anut sivitsorneqartut

Tamanit ornigarneqarsinnaasuni coronapasimik takutitsinissamut piumasaqaatit ullumi unnuap-qeqqanit atorunnaartussaagaluarput.

Coronamullu killiffik pillugu ippassaq tusagassiortunut katersortitsisoqarmat malittarisassat sivitsorneqassanersut KNR-ip apeqqutigigaluarpaa.

- Ullumi kingusinnerusukkut tusagassiutinut nalunaaruteqartoqarumaarpoq, peqqissutsimut naalakkersuisoq, Kirsten Fencker (Naleraq) naatsumik akivoq.

Nalunaaruteqartoqanngilarli. Naalakkersuisut nittartagaanni Naalakkersuisullu Facebookimi qupperneranni aamma paasissutissiissutigineqanngilaq.

AAMMA ATUARUK Paasissutissat: Nunatsinnut angalasut tamakkiisumik akiuussuserneqarsimassasut Sisimiunilu malittarisassat nutaat

Naalakkersuisulli nittartagaannut iserluni ”saqqummiussineq”, ”2021” aamma  ” Saqqummersinneqarpoq 10. august” iserfigalugit – taava corona pillugu malittarisassat sivitsorneqarsimasut atuarneqarsinnaavoq – taakkulu aggustip ulluisa 24-annut sivitsorneqarput.

Nalunaarutit nutaat Kirsten Fenckerimit atsiorneqarsimapput.

KNR-ip naalakkersuisoq Kirsten Fencker oqaaseqartinnialeruttorpaa. Nuna tamakkerlugu corona pillugu malittarisassat aggustip ulluisa 24-annut sivitsorneqarnerat sooq paasissutissiissutigineqarsimannginnersoq paaserusupparput.

Malittarisassat nuna tamakkerlugu atuuttut sivitsorneqartut tassaapput:

Ukununnga iserniaruit tamakkiisumik akiuussuserneqarsimassaatit imaluunniit coronamik tunillatsissimannginnermut uppernarsaammik sivisunerpaamik akunnernik 48-nik pisoqaassuseqartumik takutitsisinnaassaatit:

• Neriniartarfiit, kaffisorniartarfiit, imerniartarfiit, diskotekit assigisaallu, silamilu nunaminertani taakkununnga atasut.
• Kulturikkut sullissiviit – taakkununnga ilaatigut kulturip illorsui, filmertarfiit, katersugaasiviit saqqummersitsisarfiillu ilanngullugit.
• Innuttaasut illui assigisaallu.
• Atuakkanik atorniartarfiit.
• Illup iluani silamilu timersortarfiit – taakkununnga ilaatigut init inersuillu timersortarfiit, naluttarfiit, timigissartarfiit arsartarfiillu ilanngullugit. 
• Nujalerisut, tagiartuiartut, pinnersaasarfiit assigisaallu.

Tamakkiisumik akiuussuserneqarsimanissat ukunani piumasaqaataanngilaq:

• Init taakkulu nunataat atugassanik piniarfittut atorneqartut – tassa pisiniarfiit.
• Allakkeriviit.
• Mittarfiit.
• Pisortani kiffartuussinermi init (assersuutigalugu kommunimi) aamma nukissiorfiit.
• Pisortat assartuinermut atatillugu utaqqisarfiini assartuissutaannilu.
• Politikkikkut katersuunnerit
• Ulluunerani paaqqutarinniffiit
• Atuarfiit
• Ilinniarfeqarfiit
• Utoqqaat illui

Assersuutigalugu pisiniarfinni allaniluunniit tamakkiisumik akiuussuserneqarsimanermut uppernarsaateqarfiusussani suliguit tamakkiisumik akiuussuserneqarsimanermut uppernarsaateqarnissaq suliartornissannut piumasaqaataanngilaq.

Aammattaaq inuit Covid-19-imut akiuussutissamik kapitinnissamut innersuunneqanngitsut meeqqallu 17-inik ukiullit 17-illuunniit ataallugit ukioqartut ”coronapas”-imik takutitsisariaqarnermut ilaatinneqanngillat.