Coronapas pisiniarfinni piumasaqaataassanngilaq: Malittarisassat unnuap-qeqqanit atuutilertussat aaku

Unnugu nalunaaqutaq unnuap-qeqqarpat inuit 20-nit amerlaneroqqusaannginnerat tamanillu ornigarneqarsinnasuni qanermut assiaquteqaqqusineq atorunnaassapput.

Taakkununngali taarsiullugit malittarisassat nutaat tamanit ornigarneqarsinnaasut amerlanerpaartaanni atuutilissapput. Tamani ornigarneqarsinnaasut amerlanerpani tamakkiisumik akiuussuserneqarsimassaatit, imaluunniit tunillatsissimannginnermut uppernarsaammik sivisunerpaamik akunnernik 48-nik pisoqaassusilimmik takutitsissapput.

Malittarisassat aggustip ulluisa qulingata tungaanut atuukkallassapput.

AAMMA ATUARUK Corona pissutigalugu killilersuinerit Upernavimmi Aasiannilu atuutiinnassasut

Sumili uppernarsaateqartoqassava? Nalunaarut nutaaq Naalakkersuisunit saqqummiunneqaqqammerluinnarpoq, taannalu naapertorlugu ukununngarniaruit marloriarlutit kapitissimanissat piumasaqaataavoq:

• Neriniartarfiit, sutorniartarfiit, imerniartarfiit assigisaalu taakkulu silataaniiffiusinnaasortaat.
• Kulturikkut suliaqarfiit – matumani kulturikkut illorsuit, filmertarfiit, katersugaasiviit saqqummersitsiviillu.
• Innuttaasut illui assigisaalu.
• Atuakkanik atorniartarfiit.
• Illup iluanilu silami eqaarsaarnermi atortut – matumani eqaarsaartarfiit, timersortarfiit, naluttarfiit, timigissartarfiit arsaattarfiillu ilanngullugit.
• Nujalerisut, tagiartuisartut, pinnersartittarfiit assigisaalu.   

Tamakkiisumik akiuussuserneqarsimanissat ukunani piumasaqaataanngilaq:

• Init taakkulu nunataat atugassanik piniarfittut atorneqartut – tassa pisiniarfiit.
• Allakkeriviit.
• Mittarfiit.
• Pisortani kiffartuussinermi init (assersuutigalugu kommunimi) aamma nukissiorfiit.
• Pisortat assartuinermut atatillugu utaqqisarfiini assartuissutaannilu.
• Politikkikkut katersuunnerit
• Ulluunerani paaqqutarinniffiit
• Atuarfiit
• Ilinniarfeqarfiit
• Utoqqaat illui

Assersuutigalugu pisiniarfinni allaniluunniit tamakkiisumik akiuussuserneqarsimanermut uppernarsaateqarfiusussani suliguit tamakkiisumik akiuussuserneqarsimanermut uppernarsaateqarnissaq suliartornissannut piumasaqaataanngilaq.

Aammattaaq inuit Covid-19-imut akiuussutissamik kapitinnissamut innersuunneqanngitsut meeqqallu 17-inik ukiullit 17-illuunniit ataallugit ukioqartut ”coronapas”-imik takutitsisariaqarnermut ilaatinneqanngillat. 

Uppernarsaat suna takutissaviuk?

Naggammik akiuussuserneqareersimaguit sullisivik.gl aqqutigalugu paasissutissat danskit coronapasianut ilanngutitinneqarnissaannut piumasaqarsinnaavutit.

Coronapas appstorekkut playbutikkikkulluunniit aasinnaavat.

Qarasaasianik atuivallaartanngikkuit akiuussutisserneqarsimanermut paasissutissat e-boksinnut pdf-inngorlugit nassiunneqarnissaat piumasinnaavat. Taanna anillatseriarlugu kaasarfimmiorsinnaavat.

Aamma allamik ajornanngitsunnguamik periarfissaqarpoq: Akiuussuserneqarlerninni pappiaraq atinnik kapitinnernullu piffissamik allagartaqartoq aamma tigummiinnarsinnaavat.

Akiuussuserneqarsimaninnut uppernarsaat kimut takutissaviuk?

Pisiniarfiit uppernarsaammik takunnikkusunnerlutik namminneq aalajangissavaat. Politiilli sumiiffimmiikkunik uppernarsaat takujumassavaat.

Aasianni, Upernavimmi Upernaviullu qanittuani inuit 20-nit amerlanerusut katersuuteqqusaanngillat tamanillu ornigarfigineqarsinnaasuni kikkut tamarmik qanermut assiaquteqassapput. Tamanna aqunneqarsinnaanngitsumik tuniluuttoqarneranik pissuteqarpoq.