Naalakkersuisoq corona pillugu paasissutissat amigarnerat pillugu: Malinnaaniarnerput ajornakusoortorujussuuvoq

Nunatsinni coronapasimik takutitsisarnissamut malittarisassat pingasunngornermi unnuap-qeqqanut atuukkunnaartussaagaluarput.

Taakkuli Naalakkersuisut nittartakkatigut Facebookikkulluunniit tusagassiuutinut nalunaaruteqanngitsulluunniit aggustip ulluisa 24-annut sivitsorneqarput.

Kisianni nalinginnaanngitsumik eqqingagaanni nalunaarut Naalakkersuisut nittartagaani nammineq nassaarineqarsinnaavoq. Taamaaliornissamullu ”saqqummiussineq”, ”2021” aamma  ”Saqqummersinneqarpoq 10. august” iserfigineqaqqaartussaapput.

Malittarisassat sivitsorneqarnerat peqqissutsimut naalakkersuisumit, Kirsten Fenckerimit atsiorneqarput.

Ulapputtoqangaatsiartoq

- Ulluni makkunani atorfilittat ulapittupilussuupput, ilaatigut Sisimiuni tuniluunneq peqqutigalugu, taamaattumik angummanniarpiloortupilussuuvugut. Tamatuma kingunerisaanik kukkullattaanerit pipput, ulapinnerput tamatumanik pissuteqarpoq, Kirsten Fencker KNR-ip raadiukkut ullaakkut aallakaatittagaanut, Aasarpalaamut oqarpoq.

KNR-ip nutaarsiassaqartitsiviata taanna ippassarli nassuiaateqartinniaraluarpaa – iluatsinngitsumilli.

Inuit paasissutissanik nutaanik tusarnissaminnut utaqqipput. Sooruna paasissutissiiginnarsinnaanngitsusi?

- Paasisinnaavara innuttaasut paasissutissanik perusummata, sapinngisarput tamaat sulivugut angummanniarsarivugut. Apeqqutissaqarunik corona hotlinemut sianersinnaapput e-mailikkulluunniit allassinnaapput, peqqissutsimut naalakkersuisoq Aasarpalaamut oqarpoq.

Naalakkersuisut namminneq "malinnaasinnaanatillu ulapittorujussuuneranni" mailikkut akissutersinissaq qanoq piviusorsiortiginersoq paasiniarlugu KNR-ip Kirsten Fencker akissuteqartinniarsaraa.

Aammattaaq killilersuinerit nutaat sivitsorneqartullu pillugit namminneq paasissutissarsiniarnissaq inuit qanoq ilillutik namminneq akisussaaffigilersinnaaneraat paaserusupparput.

Malittarisassat sivitsorneqartut nunatsinni tamarmi atuuttut aaku:

Ukununnga iserniaruit tamakkiisumik akiuussuserneqarsimassaatit imaluunniit coronamik tunillatsissimannginnermut uppernarsaammik sivisunerpaamik akunnernik 48-nik pisoqaassuseqartumik takutitsisinnaassaatit:

• Neriniartarfiit, kaffisorniartarfiit, imerniartarfiit, diskotekit assigisaallu, silamilu nunaminertani taakkununnga atasut.
• Kulturikkut sullissiviit – taakkununnga ilaatigut kulturip illorsui, filmertarfiit, katersugaasiviit saqqummersitsisarfiillu ilanngullugit.
• Innuttaasut illui assigisaallu.
• Atuakkanik atorniartarfiit.
• Illup iluani silamilu timersortarfiit – taakkununnga ilaatigut init inersuillu timersortarfiit, naluttarfiit, timigissartarfiit arsartarfiillu ilanngullugit. 
• Nujalerisut, tagiartuiartut, pinnersaasarfiit assigisaallu.

Tamakkiisumik akiuussuserneqarsimanissat ukunani piumasaqaataanngilaq:

• Init taakkulu nunataat atugassanik piniarfittut atorneqartut – tassa pisiniarfiit.
• Allakkeriviit.
• Mittarfiit.
• Pisortani kiffartuussinermi init (assersuutigalugu kommunimi) aamma nukissiorfiit.
• Pisortat assartuinermut atatillugu utaqqisarfiini assartuissutaannilu.
• Politikkikkut katersuunnerit
• Ulluunerani paaqqutarinniffiit
• Atuarfiit
• Ilinniarfeqarfiit
• Utoqqaat illui

Assersuutigalugu pisiniarfinni allaniluunniit tamakkiisumik akiuussuserneqarsimanermut uppernarsaateqarfiusussani suliguit tamakkiisumik akiuussuserneqarsimanermut uppernarsaateqarnissaq suliartornissannut piumasaqaataanngilaq.

Aammattaaq inuit Covid-19-imut akiuussutissamik kapitinnissamut innersuunneqanngitsut meeqqallu 17-inik ukiullit 17-illuunniit ataallugit ukioqartut ”coronapas”-imik takutitsisariaqarnermut ilaatinneqanngillat.