Inuusuttut akornanni tuniluuttoqaraluartoq: Aasianni GUX ammarpoq
Aasianni GUX-imi ilinnialertut nutaat 1.g-t tallimanngormat atualerput.
Inuusuttorpassuit – qilanaartut misigisassanullu nutaanut piareersimasut - ilinniarnerup ulluinut siullermut takkupput.
Atuartulli ukiup atuarfiusup pisarnermit allaanerungaatsiarnissaa piareersimaffigissavaat. Coronami pissutigalugu pissutsit ulluinnarnut sunniuteqangaatsiartoq, atuarfiup rektoria, Dorthie Siegstad oqarpoq:
Aasianni, Upernavimmi Sisimiunilu coronamik tunillatsisisimasoqarnera
Upernavimmi, Upernaviup nunaqarfiini Aasiannilu corona pillugu malittarisassat tuniluuttoqarnera pissutigalugu atuunnissaat sivitsorneqarput.
Malittarisassat aggustip ulluisa qulinganni atorunnaartussaagaluarput, taakkuli aggustip ulluisa 24-anut atuuttussanngortinneqarput.
Taamaammat tamanit ornigarneqarsinnaasuni qanermut assiaquteqartoqaannassaaq inuillu amerlanerpaamik 20-t kisimik katereqqusaapput.
Malittarisassat Sisimiuni tuniluuttoqarnera pissutigalugu aamma atuutilersinneqarput.
- Inersuarmi aulami naapittaraluarpugut, ukioq mannali atuarfiup silataani immitsinnut qanillinaveersaarfigisinnaasatsinni naapippugut. Ilinniartut ineqarfiini pulaartoqaqqusaanngilaq, ineqarfinnilu ataatsimoortumik igaffilinni najugaqartut ineerateqartullu sømandshjemmimi najugaqassapput, taamaalilluta tuniluuttoqartitsinaveersaassalluta, rektori oqarpoq.
Atuarnerup aallartinnginnerani tunillatsissimannginnermut uppernarsaateqassasut
Nunatta avannaanit tamarmit inuusuttunik amerlasuunit katersuutsitsinermi tuniluuttoqarnissaanut aarlerinartoqarnera Aasianni GUX-imi sapaatip-akunnerata siuliani nalaanneqarpoq, tassa arnaq inuusuttoq illoqarfigisamini tunillatsissimanngitsutut uppernarsarneqaraluarluni Aasiannut tikikkami napparsimasoq paasineqarpoq.
Taamaammat ilinniarnerup aallartinnissaanut tunillatsissimannginnermut uppernarsaateqartoqarnissaa maanna piumasaqaataalerpoq:
- Aasiaanniit, Sisimiuniit Upernavimmiit pigisaaniillu ilinniartut tamarmik napparsimannginnerminnik uppernarsaateqarnissaminnut misissortinnissaannik qinnuigaakka, Dorthie Siegstad oqarpoq.
Akiuussutissamik kapitittoqarnissaa kaammattuutigigaa
Tunillatsittut – tunillaaqqittullu maanna inuusuttuunerupput.
Tamanna nakorsaanerup, Henrik L. Hansenip tusagassiortunik sisamanngornermi katersortitsinermi oqaatigaa. Upernavimmi Upernaviullu pigisaani Tasiusami tunillatsissimasut maanna amerlanerpaapput – taakkulu agguaqatigiissillugu 31-nik ukioqartut nakorsaaneq oqarpoq.
AAMMA ATUARUK Paasissutissat: Nunatsinnut angalasut tamakkiisumik akiuussuserneqarsimassasut Sisimiunilu malittarisassat nutaat
Aasiaanni tunillatsissimasut ukiui agguaqatigiissillugit aamma appasittoq, nakorsaaneq oqarpoq.
- Taamaammat inuusuttut akiuussutissamik kapitinnissaat pingaaruteqarpoq. Tunillaassuineq unitsinneqanngikkuni ukioqatigiiaanut allanut tuniluutissaaq.
Ilinniarnertuunngorniarfinni atuartut amerlasuut 16-init 17-inut ukioqarput, taamaammat akiuussusersuinermut qanittumi ilaatinneqalernikuupput.
Taamaammat amerlasuut akiuussutissamik siullermeertumik aappassaaneertumillu suli kkapitinneqanngillat:
- Sumiiffinni amerlanerusuni tamakkiisumik akiuussuserneqarnissamut suli periarfissaqanngillat. Kisianni takkukkuni akiuussutissamik kapitissimanissaat piumasaqaataanngilaq, Dorthie Siegstad oqarpoq.
- Anaanaq panini ataasiaannarluni kapitissimagaluarluni atuariartorsinnaanersoq paasiniarlugu sianeqqammerpoq. Oqarpunga: Soorunami, Dorthie Siegstad nassuiaavoq.
Ilinniartut tamarmik akiuussutissamik kapitinnissaanik kaammattorniarpaat.
Coronamik tunillatsissimasoqarnerani ukiup atuarfiusup aallarteqqinnissaa pissangagaajuk?
- Misiginikuunngilarpummi. Ulluinnaat ingerlaannassapput, kisianni ajornerulissagaluarpat pilersaarusiaqarpugut. Annilaanganngilanga, toqqissisimavunga ajornavianngilaq. Coronamik tunillatsissimasoqarumaarpoq, taamaattoqarpalli tuniluunnissaa pinaveersaartissavarput, rektori oqarpoq.
