Sissu Petersen nalunnermi Danmarkimi pissartanngorniunnermi bronzennappoq

14-nik ukiulik Sissu Petersen bronzennappoq. Taamaasilluni naalagaaffeqatigiinnermi ukioqatimini nallorinnerpaat pingajuattut inissippoq.

Siornatigut Nuummi angusarissaartareerluni tamatumuuna ukioqatimini Danmarkimi nallorinnerpaat unammivai.

Unammineq peqataaffigisaa tassaavoq Danmarkimi ukioqatigiit pissartanngorniunnerat tallimanngornermiit sapaat ilanngullugu Gentoftemi Kildeskovshallenimi pisoq.

Naluttaatsimi crawlimi 400 meterimut bronzennappoq aammalu naluttaatsimi tassani 200 meterimut angusarissaarluni sisamaattut inissilluni. Crawlimi isorartussutsinut assigiinngitsunut angusat katinneranni aamma bronzennappoq.

AAMMA ATUARUK Nalunneq: Sissu Petersenip DM-mut piumasaqaat siusinaartumik anguaa

Naluttariaatsit assigiinngitsut atorlugit 400 meterimut medleymi unamminermi aamma arfernattut inissippoq.

- Naatsorsuutigigaluarpara pikkorinnerit 15-it imaluunniit 20-it akornanniissallunga. Taavali bronzennappunga, sisamaattut arfernattullu inissillunga. Tamanna naammagisimaarluarpara, Sissu Petersen KNR-mut oqarpoq.

August naalersoq sungiusaasunilu Jonas Tetzchner Danmarkiliarput ukioqatimini Danmarkimi nallorinnerpaat unamminnginneranni sungiusarnissaq siunertaralugu.

- Ilimanarpoq Danmarkimi sungiusarneq pikkorinnerit 15-nit akornanniit bronzennannermut qaffariaatigigaa, Jonas Tetzchner oqarpoq.

Peqatigiiffiit sulisorissaartut unammivai

Angusai aamma Danmarkimi ukioqatigiiaat pissartanngorniunneranni peqataasunit uisaallaatigineqarput. Peqatigiiffinnit 50-neersut naluttartut 398-it sapaatip akunnerata naanerani unammeqataapput peqataasullu tamarmik anngunniuteqqaarlutik inaarutaasumik unammersuarnermi peqataapput.

- Uisaallattoqarpoq. Siornatigut Kalaallit Nunaanneersumik Danmarkimi taamatut peqataasoqarnikuunngilaq, Jonas Tetzchner oqaluttuarpoq.

AAMMA ATUARUK Video: Nuummi naluttartoq 13-nik ukiulik oqaluttuarisaanermut ilannguppoq

- Ujammit pissarsiariinnariaanngillat. Ujaminnattuniit amerlanerujussuit ujaminnanngisaannartussaapput. Danmarkimilu klubbit anginerit pingasut angullugit piffissaq tamakkiisoq suliffigalugu sungiusaasoqarput, timersornermut pisortaqarlutik peqatigiiffiullu ingerlatinneranut sulisoqarlutik, Jonas Tetzchner Nuummi Naluttartut Klubbianni nammineq piumassutsimik suliniartunit ingerlanneqartumi sungiusaasoq oqarpoq.

Sissu Petersen aamma Jonas Tetzchner ullumi Nuummut angerlarput.