Sermimit marraq pillugu suliniut 45,5 millionit koruuninik aningaasaliiffigineqartoq
Professorip, suliffeqarfimmillu maanna aallarniisup Minik Rosingip nunatta sermianit marraq naggorissaatissaqqissuusinnaasutut nunatsinnilu inuussutissarsiornissamut periarfissarujussuartut 2017-imi saqqummiuppaa, mingutsitsinnginnerusumillu nunaateqarsinnaanissamut aqqutissiuisinnaanersoq misissuleruttorpaa.
Ingerlatseqatigiiffialu Rock Flour Company tassunga atatillugu 45,5 millionit koruuninik maanna aningaasaliiffigineqarpoq.
Nunattalu sermianit marramik tunisassiorsinnaanissaq pillugu suliffeqarfiup aallartissinnaanissaanut aningaasaliineq periarfissiivoq.
- Sulisunik pikkorissunik tunuliaqutaqarluta suliffeqarfiup aningaasaliiffigineqarnissaa nuannaarutigaarput, suliffeqarfik annertusineqarsinnaaniassammat.
Nunanik allanik niueqatigiinnermi, aningaasaliinermullu aningaasaateqarfimmi EIFO-mi tusagassiisartoq Erik Balck Sørensen tusagassiorfinnut nalunaarummi allappoq.
Marraq naggorissaatitut atorneqarsinnaasoq
Immikkut ilisimasallit Rock Flour Companymiittut naapertorlugit Kalaallit Nunaanni sermimit marraq minguitsuuvoq pinngortitameersoq. Toqunartortaqanngilaq, atortussianik inuussutissanillu ulikkaarluni.
- Kaliumeqarlunilu, fosforeqarpoq, inuussutissanillu allanik aamma peqarluni. Sermimit marraq CO2-mik annikillisaaqataasinnaavoq, silallu pissusiata allanngoriartorneranut akiuiniarnermut iluaqutaasinnaalluni, EIFO oqarpoq.
Sermersuup sermiata nunatsinni qaarsutigut ingerlaarnera marrarmik 1 milliard tonsinik pilersitsisarpoq, nunaateqarnermilu CO2-mik annikillisaaqataalluarsinnaalluni.
Nunaateqarnerup silap pissusiata allanngoriartornerata akiorniarneqarneranut matumani pingaaruteqarnissaa periarfissaavoq. EIFO tusagassiorfinnut nalunaarummi taama allappoq.
