Sermimit marraq pillugu suliniut: Piiaanissamut akuersissutimik qinnuteqalersut
Sermersuup sermiata nunatsinni qaarsutigut ingerlaarnera marrarmik 1 milliard tonsinik pilersitsisartoq, Københavns Universitetimi Globe Institutemeersup Christiana Dietzenip professorillu Minik Rosingip International Journal of Greenhouse Gas Controlimi allaaserisaanni atuarneqarsinnaavoq.
Sermimit marraap sanaaneqaataa mikeqigamik brintillu atomiinut akulerunnermikkut CO2-mik kulsyrenngortitsisinnaasut ilisimatusartut tassani allapput. Taamaalilluni gassimik silaannarmik kissakkiartortitsisartunik aniatitsineq millissasoq, ilisimatusartut allapput.
Minik Rosing sermimit marrap naggorissaatitut atorneqarsinnaanissaanik tunngavilersukkamik ilimasuutini 2017-imi Future Greenlandimi saqqummiuppaa. Sermimit marrarmut suliniut pillugu ima oqaluttuarpoq.
- Sermimit marrarmik suliniut ilisimatusarnikkut suliniutaariarluni atortussamik Kalaallit Nunaata avammut tuniniarsinnaasaanik ineriartortitsinissamut suliniutinngorpoq, Minik Rosing oqarpoq.
Nioqqutissaq nutaaq
Ingerlatseqatigiiffik Ilulialimmi misissuinissamut 2028-mi decembarip ulluisa 31-annut akuersissuteqartoq Itinnera Solution ApS misisssuinissamut akuersisssummik Namminersorlutik Oqartussanit 2024-imi januaarip aallaqqaataani pissarsivoq. Itinnera Solution ApS-ip aqqata aappaa tassaavoq Rock Flower Company, taannalu aatsitassanik misissuinissamik siunertaqarpoq.
- Ingerlatseqatigiiffik piiaanissamik akuersissuteqarnissamik qinnuteqarpoq, Ilulialimmilu Nuummit avannaani kangiani 100 kilometerinik ungasitsigisumiittumi misissuinissamik akuersissuteqarluni, Minik Rosing oqarpoq.
Minik Rossingip piiaanissamut akuersissummik ukiut marlussuk iluini pissarsinissani neriuutigaa. Ingerlatseqatigiiffilli nioqqutissaminik nittarsaassinissaminut unammilligassaqarpoq.
- Nioqqutissamik suli pilersinneqanngitsumik tuniniaasumik suliffeqarfiuteqarluni eqqumiilaarpoq. Atortussamik pilissuuvoq, qanorli tuniniarneqassanersut suli naluarput, taamaaattumillu suli tuniniaaveqarnani. Tassalu tuniniaavimmik nioqqutissanillu ataatsikkut pilersitsisariaqarpugut, Minik Rosing oqarpoq.