Video: Nuummi naluttartoq 13-nik ukiulik oqaluttuarisaanermut ilannguppoq

Nuummi naluttarfimmi ataasinngornermi unnukkut aqqaamasoqarpoq.

Malinnaaqqissaarfigineqartoq tassaavoq nalunnermi piginnaasaqarluartoq 13-nik ukiulik Sissu Petersen. Ulluni pingasuni unammiuaarneq iluatsillugu Nunatsinni naluttartoqarnermi pingaarutilimmi imminut anguniagassippoq.

Tassami ataasinngornerup unnukkua tikillugu kalaallini naluttartuni periutsimik nammineq toqqakkamik 100 meterimut nalunnermi minutsi ataallugu naluttoqarnikuunngilaq.

AAMMA ATUARUK Nunarput nalunnermi nunanut allanut unammisartoqalerpoq

Tamanna iluatsippoq 4 x 100 meterimut iligiiaarnermi. Tassani Sissu Petersen ilimi siulliulluni aallarpoq 100 meterillu naluppai 59,7 sekundit atorlugit.

Tarzanip rekordia

Ukiup ataatsip ingerlanerinnaani siuariarujussuarpoq. Sungiusarnerunissamut piumassusaa ikummarissivoq siorna Reykjavik International Games peqataaffigigamiuk. Sukkassutsinilu minutsinik arlalinnik ukiup ataatsip ingerlanerinnaani pitsanngoriartippaa.

- Rekordiliinera nammineq tupaallaatigaara. Taama siusitsigisukkut rekordiliinissara ilimagisimanngikkaluarpara, Sissu Petersen KNR-mut oqarpoq.

Periutsimi nammineq toqqakkami 100 meterimut minutsi ataallugu nalussinnaalerneq unammisartutut naluttartut killiffiattut pingaaruteqarluinnartutut isigineqartoq Nuummi Naluttartuni sungiusaasoq Jonas Tetzschner siornatigut Danmarkimi pissartaasoq nassuiaavoq.

Johnny Weismüller, aamma Tarzanitut ilisimaneqalersoq, nunarsuarmi siullersaalluni 100 meterimut minutsi ataallugu 1922-mi naluppoq. Rekordiliinera taanna ukiuni aqqaneq marlunni anguneqanngilaq.

Inuussutissarsiutigilerusuppaa

Sungiusaasorlumi tulluusimaaqaluni ataasinngornermi unnukkut Sissu Petersenimut qiimmassaavoq naluffimmiillu qaqimmat high five-mik tunilluarlugu.

- Sissu Petersen qaammatit kingulliit ingerlaneranni ukioqatimini Danmarkimi pissartanngorniuteqataanissamut anngunnissamut piumasaqaatit angusaqattaarpai Nuummi naluttartuni siullersaalluni, Jonas Tetzschner oqaluttuarpoq.

Sissu Petersen maanna aappaagu Island Gameseqarnissaanut sungiusarpoq aammalu siunissami imminut anguniagassilluni.

- Inuussutissarsiutigalugu naluttartunngorusuppunga. Tamannali angussagaanni ilungersungaatsiaqqaartariaqarpoq, Sissu Petersen nuannaaqisoq oqarpoq.

Naluttarfik Malimmi ulluni pingasuni unammiuaartoqarnerani klubbimi rekordit nutaat arlalissuit anguneqarput.