Nunarput nalunnermi nunanut allanut unammisartoqalerpoq

Inuusuttuaqqat suli naluttartutut inerikkiartorsinnaasut aappaagu qeqertarmiut unammiuaarneranni Nunarput sinnerlugu unammeqataassapput

Tuluit qeqertaanni Guernsey-mi qeqertarmiut aappaagu unammiuaalerpata nalunnermi Nunatsinneersunik unammeqataasoqassaaq. Kalaallit Nunaanni timersoqatigiit kattuffiat GIF aamma Nuummi naluttartut tamanna isumaqatigiissutigaat.

Piareersarnerillu aallartilluareerput naluttartut arlallit aasaanerani sungiusarneq ingerlatiinnassammassuk naliginnaasumik aasaanerani sungiusanngiffeqartaraluarlutik.

- Peqataasinnaanersunga aperineqaraluarpunga. Imaassinnaavormi naammaginartunik angusaqarsimasinnaaagaluartunga. Kisianni pingaarnerutippara nunanut allanut unammisartut inerisarneranni inuusuttut suli inerikkiartorluarsinnaasut aallaavigalugit suliniarnissaq, nalunnermi sungiusaasoq Jonas Tetzschner KNR-mut oqarpoq.

Taanna nammineq Danmarkimi nalunnermi unammisartuugaluarpoq aammalu peruttulerami Triton Ballerupimeersoq peqataaffigalugu naluttarfinni naatsuni aammalu iligiikkaarnermi DM-mi sølvinnaqataalluni.

OL-qataasussat unammissavaat

Jonas Tetzschner ukiut arlallit Nuummut tikinnermi kingorna Nuummi Naluttartuni sungiusaasuuvoq.

- Ukiup aappaa affaq GIF attavigisarparput Island Gamesimi peqataasinnaaneq eqqarsaatigalugu. Aamma qularinngilara nunanut allanut unammisartoqalernikkut naluttartut amerliumaartut, Jonas Tetzschner oqarpoq.

Aappaaguli Island Gameseqarnissaani ujaminnattut akornanniinnissaq ajornakusuussaaq. Tuluit qeqertaanneersut arlallit aappaagu Japanimi OL-qarnissaanut toqqagaasinnaasunut ilaapput. Naluttartut taakku 100 meterimut naliginnaasumik nalunnermi sekundit 50-t sinnilaarlugit naluttarpaat.

- Ukiup kingulliup ingerlanerani naluttartuutivut inerikkiartupiloorput. Taakku ilaat siorna sungiusarneq aallartimmat pitsaanerpaaffimmini 50 meterimut 40 sekundit naliginnaasumik naluppoq ukiorlu sungiusarfiusoq naalersoq 20 sekundit tassungarpiaq atorlugit. Piffissaq sivikikkaluartoq ineriartupiloornertut taasariaqarpoq, Jonas Tetzschner oqarpoq nangillunilu:

- Ukiumi sungiusarfiusumi nutaami annertuumik nikeriartoqaqqinnissaa ilimanarpoq tassanilu neriuutigaarput naluttartoq Kalaallit Nunaanni sungiusagarput 100 meterimut naliginnaasumik nalunnermi minutsi ataallugu naluttalersimassasoq, Jonas Tetzschner oqarpoq.

Nunanut allanut unammisartussanik suli toqqaasoqanngilaq. Ilimanarpoq aappaagu januarimi Reykjavik International Games-mi peqataanerup kingorna toqqaasoqarumaartoq naluttartut marluk imaluunniit pingasut toqqarneqassallutik.

Qeqertarmiut unammiuaarnerat Guernsey-mi aappaagu julip pingajuaniit qulingiluaata tungaanut pissaaq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat