Nalunneq: Sissu Petersenip DM-mut piumasaqaat siusinaartumik anguaa
Martsip qaammataani naluttartut unammiuaarmata Sissu Petersen immikkut maluginiarneqarpoq. Taamanikkummi ulluni pingasuni unammiuaarnermi Nunatsinni naluttartuunermi killiffimmik qaffariartitsivoq.
Maanna Sissu Petersen maluginiarneqaqqippoq tassami 100 meterimut naluttaatsimi nammineq toqqakkami kalaallini siullersaalluni minutsi ataallugu angusani pitsanngoriartippaa.
AAMMA ATUARUK Video: Nuummi naluttartoq 13-nik ukiulik oqaluttuarisaanermut ilannguppoq
Rekordia maanna tassaalerpoq 58,53 sekundit sapaatip akunnerata naaneranilu unammiuaarnermi katillugit klubbimi Nunatsinnilu rekordit arfineq pingasut anguai. Rekordiisa ilagaat 100 meterimut brystsvømningimi nalunneq tassani 1.16,52 minutsit atoramigit.
- Tassa 100 meterimut brystsvømningimi sukkasuumik nalunnermigut ukioqatimini 2022-mi Danmarkimi pissartanngorniunnissamut anngunnissamut piumasaqaat anguaa. Taama sioqqutsitigisumik anngunneq ajunngeqaaq, Nuummi naluttartuni sungiusaasoq Jonas Tetzchner KNR-mut oqarpoq.
AAMMA ATUARUK Video: Nuummi naluttartoq 13-nik ukiulik oqaluttuarisaanermut ilannguppoq
Taassuma ilanngullugu oqaatigaa Nuummi inuusuttuaqqani naluttartut arlallit ima kakkatsigilersut Danmarkimi unammiuaarnerni angummassinnaalersimallutik.
Nuummili nalunnermi unammiuaartarnerit akuttupput, taamaattorli Nuummi naluttartuni sungiusaasoqatigiit naluttartut kajumissuseqartittarpaat taamalu naluttarfimmi angusaat pitsanngoriartissinnaallugit.
- Taakku suli meeraapput. Ilaatigummi inersimasutut isigeqqajaaneqarsinnaasaramik inersimasunut anngukkiartulerneranni, Jonas Tetzchner oqarpoq.
- Suli eqqarsaatsimikkut meeraapput. Tamannalu paariniarsarisarparput sungiusarnerup pinnguarnermut eqqaanartumik ingerlattarneratigut, Jonas Tetzchner oqarpoq.
Sakkortuumik sungiusarusussuseqarnissamut angalanerit qilanaarutissatut atorneqartarput. Naluttartullumi peqatigiiffiat katersuiniarsimavoq naluttartut Nunatta avataanut soorlu Islandimut Danmarkimulluunniit angalasinnaaniassammata.
