Siriusip alapernaarsuisuini peqataasimasut kalaallinik amerlanernik peqataasoqartalernissaa neriuutigigaat
Kalaallit amerlanerit Siriusip alapernaarsuisuini peqataasarnissaat kalaallit danskillu politikeriisa kissaatigaat.
Tamanna illersornissamut isumaqatigiissummi kunngeqarfiup Issittumik siunissami illersuinissaanut sinaakkusiisussami naalagaaffinngornissamut nunanullu allanut naalakkersuisumit Vivian Motzfeldtimit danskillu illersornissamut ministeriannit Troels Lund Poulsenimit ullumi saqqummiunneqartussami anguniagaavoq.
Ilaatigut timmisartuaqqanut ungasianit aqunneqartartunut, torpedonut ilinniarnermullu isumaqatigiissuteqarput. Taavalu nunatta nunatsinni, nunatta silaannaani imartaanilu illersueqataanerulernissaa anguniarneqarpoq.
Kalaallit amerlanerit Siriusip alapernaarsuisuini peqataasarnissaat ilaatigut isumaqatigiissutigineqarpoq.
Tamannalu isumassarsiatsialaasoq, alapernaarsuisuni 1994-imit 1996-imut peqataasimasoq Asger Fredslund isumaqarpoq:
- Iluaqutaasorujussuunissaanik eqqarsarpunga. Assigiinngisitaartoqarnissaata alapernaarsuisunut iluaqutaanissaa isumaqartorujussuuvunga. Kalaallit arnallu amerlanerujartortut qinnuteqartalernissaat ilimagaara, Asger Fredslund oqarpoq.
Kalaallit inuiaat immikkut ilisimasaqartut
Ingammik kalaallit amerlanerit Siriusip alapernaarsuisuini peqataasalissappata iluaqutaassasoq taanna isumaqarpoq. Nunammi inuiaavisut piginnaasaat immikkuullarissuupput.
- Kalaallimmi Issittumi peroriartorput, nunallu ilusaanik nunamilu pinngortitami qanoq iliornissaq nalunagu. Pinngortitap nukinga ataqqivaat, Asger Fredslund oqarpoq.
- Aamma qimuttunik qimmeqarfiusuni peroriartorsimagunik allaanerusumik ilisimasaqassapput. Qanoq aqunneqartarneri qanorlu qimuttoqartarnersoq. Piginnaasallu taakku taama suliaqarnermi iluaqutaasupilussuussapput.
Kalaallit Siriusip alapernaaarsuisuini peqataasinnaapput, kalaallilli alapernaarsuisuni peqataasartut amerlanerunissaat annerusumik iliuuseqarfigineqanngilaq.
Tamannalu illersornissamut isumaqatigiissutikkut allanngortinniarneqartunut ilaavoq.
Siriusip alapernaarsuisuini suleqatigiinneq
Kalaallit ikittuinnaat Siriusip alapernaarsuisuini peqataanikuupput. Alfred Olsen taakkununnga ilaavoq. Taanna 1970-ikkut naajartorneranni peqataavoq, kalaallillu amerlanerit alapernaarsuisuni peqataasalernissaata pilersaarutaanera nuannaarutigaa.
- Kalaallit inuusuttut nunatta killeqarfiinik nakkutilliinermut akisussaaffimmi ilaasariaqartut isumaqarpunga, Alfred Olsen oqarpoq.
Siriusip alapernaarsuisuini peqataanermini misilittakkani piginnaasallu ilikkakkani iluaqutigisorujussuusimallugit taanna oqaluttuarpoq. Aamma illersornissaqarfiup avataani iluaqutigai.
- Inuttut inuusuttutut nammineersinnaasutut ineriartorsimavunga. Aammalu suleqatigiissinnaanermik annertuumik ilikkagaqarsimavunga. Taavalu aamma inunnik ilitsersuinermi aqutsisinnaanermilu ilikkagaqarpunga.
Taamaammat inuusuttut amerlanerit Siriusip alapernaarsuisuini siunissami peqataasalernissaat neriuutigaa. Peqataarusuttunulli aamma piumasaqaateqarpoq.
- Inuusuttut peqqissuusariaqarput, alapernaattuullutik angusaqarusullutillu. Taakku pingaaruteqarput, Alfred Olsen oqarpoq.
