Aaja Chemnitz illersornissaqarnermut isumaqatigiinniarneq pillugu: Pissusissamisut suli ingerlanngilaq

- Nunatsinneersugut naligiimmik tamakkiisumillu ilaatinneqarnissatsinnut atatillugu pissusissamisut suli ingerlasoqanngilaq.

Folketingimut ilaasortaq, Inuit Ataqatigiinneersoq, Aaja Chemnitz Folketingimi amerlanerussuteqarluartut Illersornissaqarfiup siunissami aningaasaqarnissaata toraagarisassaatalu ilaanik siullermik saqqummiussinerisa aqaguani oqarpoq.

Isumaqatigiissut Issittumut tunnganeruvoq, tamanna naalakkersuisut Savalimmiunilu naalakkersuisut aamma isumaqatigiinniaqataaffigaat.

Kalaallilli savalimmiormiullu partiivi Folketingimiittut pillugit assinganik oqartoqarsinnaanngilaq, aamma naak danskit naalakkersuisuisa naalakkersuisuni tunngavimminni neriorsuutiginikuugaluaraat, IA-mit politikeri isumaqarpoq.

- Naalakkersuisut nunatsinnut tunngatillugu naggataani oqaaseqartussaanerat ataqqingaatsiarpara. Kisianni isumaqatigiinniarnerit arlallit aamma danskit partiivinut tunngasoq uagut aamma peqataaffigisariaqaraluarigut oqaatigissallugu pingaartuusoraara, taanna oqarpoq.

IA danskit partiivisa partiivi peqatigalugit sammisat pillugit ataatsimiinnissanut aggersarneqarsimasoq, Aaja Chemnitzip KNR-ip paasissutissiiffigaa. Nunanit avannarlernit partiit aamma imminnut ataatsimeeqatigiissimapput, tassanilu illersornissamut ministeri, Troels Lund Poulsen (V) peqataalluni.

Ataatsimiinneq kingulleq isumaqatigiissutip ilaata tusagassiortunut saqqummersinneqarnissaanut ullormi tassani ataatsimiinneruvoq.

Aaja Chemnitzip ingerlatsinermik saqqummiussinera Folketingimi ilaasortaaqatigisaanit, Aki-Matilda Høegh-Damimit Siumumeersumit taperserneqarpoq.

- Isumaqatigiinniarmi ilaasimasugut oqaatigisinnaanngilara. Isumaqatigiinniarnerit pillugit ingerlaavartumik ilisimatinneqartarpugut, sammisallu pillugit ataatsimiinnernut peqataanikuulluta, kisianni isumaqatigiinniavinnissanut qaaqquneqarnikuunngilagut, taanna oqarpoq.

Timmisartuaqqat ungasianiit aqunneqarsinnaasut, torpedot ulapungaarsimanermillu ilinniarfimmi inissat amerlanerusut

Aaja Chemnitzilu illersornissamut ministeri illersornissamut isumaqatigiissut pillugu marluinnaallutik ataatsimeeqatigiinnikuullutik. Kisianni kalaallit savalimmiormiullu partiivi danskit partiivinut isumaqatigiinninniariartoqquneqarnikuunngillat.

- Folketingimi partiit qaaqquneqaraangata kalaallit savalimmiormiullu partiivi isumaqatigiinniarnernut tamanut aamma qaaqquneqartariaqaraluartut isumaqarpunga, taanna oqarpoq.

Tassunga taarsiullugu IA-meersup isumaqatigiinniarnerit danskit suleqatigini Christiansborgimiittut pisortatigoortuunngitsumik oqaloqatigalugit sunniiviginiarsarisimavai. Tamannalu aamma angusaqarfiusoq taanna isumaqarpoq.

Kisianni nunarput Folketingimi ilaasortaatitaqaruni naalakkersuisut danskillu naalakkersuisuisa taakku assigiimmik aamma ilaatittariaqarai, Aaja Chemnitz oqarpoq.

- Sannaanik paasinninniarneq ajornakusoortinneqalaarpasittutut ippoq, immaqalu nunatsinnut sinniisuusugut oqalliseqatiginissarput ersigilaarlugu. Tamanna uggornarluinnarsoraara, taanna oqarpoq.

KNR-ip illersornissamut ministeri, Troels Lund Poulsen isornartorsiuinermut oqaaseqarnissaa utaqqivaa.