Illersornissaqarfiup Issittumi suliassaanut isumaqatigiissut
Torpedot, silaannakkullu saassunneqarnermi illersuutit illersornissaqarfiup Issittumi umiarsuaannit atorneqarsinnaasut, timmisartuaqqallu ungasianit aqunneqarsinnaasut ungasissumullu ingerlaarsinnaasut, akeqqanillu nakkutilliinermut aamma atorneqarsinnaasut.
Illersornissaq pillugu isumaqatigiissutip immikkoortuisa ilaat, Folketingimilu partiit amerlanerussuteqartut naalakkersuisut, Savalimmiunilu naalakkersuisut peqatigalugit sisamanngornermi taama isumaqatigiissusiorput.
Upalungaarsimanermi Kangerlussuarmi ilinniarfimmut amerlanerusunik isumaqatigiissut aqqutigalugu aamma aningaasaliisoqarniarpoq. Ilinniarfimmut tassunga qinnuteqarnissamut soqutiginnittoqartorujussuuvoq.
Naalagaaffinngornissamut Nunanullu allanut Naalakkersuisup Vivian Motzfeldtip tamanna nuannaarutigaa. Illersornissaqarfiup tusagassiorfinnut nalunaarutaani taama oqarpoq:
- Timmisartuaqqat ungasianit aqunneqarsinnaasut pillugit illersornissamut isumaqatigiissummi maannamut atuuttumi isumaqatigiissutigineqareersumut naapertuutinngiinnarani, illersornissamut isumaqatigiissutip immikkoortuisa ilaata isumaqatigiissutigineqarneratigut illersornissaqarfiup Kangerlussuarmi tunngaviusumik ilinniarfia siunissami aningaasaliiffiginerusinnaavarput, ilinniarfimmummi tassunga qinnuteqarnissamut soqutiginnittoqartorujussuuvoq, Vivian Motzfelst oqarpoq.
Illersornissamut isumaqatigiissutip immikkoortuisa ilaat pineqartoq 16 milliardit koruuninik aningaasartaqarpoq, taakkunannga affaat sinnerlugit atortunik nutaanik pisiortornissamut atorneqassapput, illersornissaqarfiup umiarsuaasa timmisartuaqqanik ungasianit aqunneqarsinnaasunik pilersorneqarnissaannut, sakkussanillu pilersorneqarsinnaanissaannut atorneqassallutik.
Aningaasat 5 milliardit koruunit illersornissaq pillugu isumaqatigiissummi aamma ilassutigineqarnissaat partiit isumaqatigiissutigaat, timmisartuaqqammi ungasianit aqunneqarsinnaasut Issittummi atorneqarsinnaasut ilimagisamit akisunerummata.
Tamannalu pisariaqartoq Vivian Motzfeldtip oqaatigaa:
- Kalaallit Nunaata illersorneqarnissaa isumannaatsuunissaalu uannut Kalaallit Nunaannilu innuttaasunut pingaaruteqaqaaq. Naalakkersuisut illersornissaq pillugu isumaqatigiissutip immikkoortuisa ilaannut peqataatinneqarnerat aqqutigalugu Danmarkimi naalakkersuisut suleqatigilluarneqarnerulissapput, taanna oqarpoq.
Illersornissaqarfiup ilusissaa aningaasalersorneqarnissaalu pillugu isumaqatigiissutissat allat ukiup massuma ingerlanerani isumaqatigiinniutigineqarumaarput. Sakkutuujusussaatitaaneq pillugu ilaatigut isumaqatigiissusiortoqassaaq, illersornissamut ministeri Troels Lund Poulsen ilisimatitsivoq.
