Ilinniarneq

Politikerit ukiorpassuarni massa akerliusut Upalungaarsimanermik ilinniarfittaami aallartikkusuttorpassuaqartoq

Kangerlussuarmi upalungaarsimanermik ilinniarfittaami aallartikkusuttorpassuummata tassani inissat pilerngunneqartussaassapput. Ilinniarfittaaq taanna politikerit akornanni assortuussutaaqisoq periarfissaqarluartitsisoq, inuusuttut isumaqarput.
Kangerlussuarmi Issittumi tunngaviusumik ilinniarfittaaq soqutigineqaqisoq, Issittumi Sakkutooqarfik oqarpoq. Assi © : Arktisk Kommando
Allattoq Mads Malik Fuglsang Holm
novembarip 17-at 2023 16:55
Nutserisoq Hanne Petersen, Connie Fontain

Issittumi Sakkutooqarfik Kangerlussuarmi Issittumi Upalungaarsimanermik ilinniarfittaami, maajimi ammartussami ilinniartussarsiorlutik sapaatini akunnerni kingullerni illoqarfinnut arlalinniipput.

Soqutiginnittorpassuuppullu.

Inuusuttut 149-t ilinnialersinnaanissamut misilitsipput, taakkunanngalu 61-it qinnuteqaatertik tunniutereerpaat.

Tom Mathæussen Tasiilameersoq taakku ilagaat.

- Nassuiaasseriarmata soqutiginnikkaluttuinnarpunga, misilitsikkatta suliaqartinneqarluta oqaluttuunneqarlutalu, misilerusunnarsivoq sakkutuunngorniarnissaq nassuiaammata  soqutiginarlunilu kajuminnarsivoq, taanna KNR-imut oqarpoq.

Laila Maratse ilinniarfissamut nutaamut aallaqqaammut soqutiginnippallaanngikkaluarluni aamma misilitsippoq. 

- Uannut soqutiginarnissaa eqqarsaatiginngikkaluarpara, kisianni atuarfinnukarlutik ilinniagaq saqqummiummassuk soqutiginnilerpunga, taanna oqarpoq.

Ilinniarfimmi nutaami atuartut 15-it missaanniittut aallartinnissaat naatsorsuutigineqarpoq.

Upalungaarsimanermik ilinniarfittaaq soqutigineqaqisoq

Inuusuttut taama amerlatigisut Illersornissaqarfimmi ilinniarusussuseqarnerat Issittumi Sakkutooqarfiup nuannaarutigaa.

Illoqarfinni ilinniagaq nutaaq pillugu saqqummiisoqaraangat inuit ukiui assigiinngisitaartut takkuttartut, Issittumi Sakkutooqarfiup suliniutaani naalagaq, Jacob Hvid oqarpoq.

- Soqutigineqaqaaq. Inuusuttut ilinniagaq pilerseqqammisarput pillugu paasisaqarnerorusuttut imaaginnavipput, Jacob Hvid oqarpoq.

Issittumi tunngaviusumik ilinniakkamik aallartitserusullutik misilitsittuni angusisut decembarip 31-utinnagu qinnuteqarsinnaapput. Taamaammat maannakkut qinnuteqareersunit 61-init amerlanerusut sapaatit akunnerini aggersuni qinnuteqaratarsinnaapput.

Issittumi Sakkutooqarfimmiut Kangerlussuarmi ilinniagaq nutaaq pillugu Ilulissani, Aasianni, Sisimiuni, Nuummi, Qaqortumi Tasiilamilu saqqummiillutillu ilinniakkamik taassuminnga aallartitsinissamik misilitsikkusuttussarsiorput. Assi © : Arktisk Kommando

Naalakkersuisuni assortuussutaasoq

Illersornissaqarfimmiut ilinniakkamik aallartitsinissamik misilitsikkusuttussarsiorlutik nunatsinni 2019-imi kingullermik angalagamilli maanna aatsaat taamaalioqqipput.

Inuusuttunimmi sakkutuujusussaatitaanermik misilitsikkusuttussarsiorlutik nunatsinni illoqarfiit ilarpaaluinut 2018-imi 2019-imilu angalapput. Inuusuttut nunatsinneersut 37-t sakkutuujusussaatitaanermik ilinniakkamik tamatuma kingorna aallartitsipput.

Illersornissaqarfilli tamatuma kingorna ulloqartinneqassaarpoq. Coronavirusimi taamani tuniluuppoq, Illersornissaqarfilli nunatsinni ulloqartinneqartarunnaassasoq taamanikkut naalakkersuisoqatigiit, tassa Inuit Ataqatigiit Naleqqallu, tamatuma kingorna aamma kissaatigaat.

Naalakkersuisulli Danmarkimilu naalakkersuisut Kangerlussuarmi Issittumi tunngaviusumik ilinniagaqalernissaanik 2022-mi naapeqatigiillutik isumaqatigiipput.

Issittumi tunngaviusumik ilinniagaq suua?

  • Upalungaarsimaneq sakkutuutullu piginnaasaqarneq ukkataralugit ilinniarfik
  • Ilinniarfik Danmarkip illersornissamut ministereqarfianit 50 millionit koruuninik aningaasalersorneqarpoq.
  • Ilinniarfimmi ilinniarneq ukiup affaanik sivisussuseqarpoq. Ilinniartut ilinniarnermik ingerlanerata naggataani Danmarkimi Sakkutuuni Imarsiortuniissapput.
  • Ilinniartut Illersornissamut ministereqarfimmit akilerneqartunik akissarsisassapput, nerisassaqartinneqartassapput inissaqartinneqarlutillu.
  • Ilinniartutut akuerineqassagaanni silassorissutsimut misilitsissapput. Misilitsissut kalaallit oqaasiinut kulturinnullu tulluarsagaassaaq. Tamatuma kingorna qinnuteqartut ataasiakkaarlutik nalilersorneqassapput, peqqissutsimullu misissortissimasussaallutik.
  • Ilinniarfimmi naammassineq politiinngorniarfimmut Illersornissaqarfimmilu ilinnialernissamut isissutaasinnaavoq.

Tigusiffik: Issittumi Sakkutooqarfik

Allisiguk

 

Tassani ilinniarsimasut Illersornissaqarfiunngitsumi sulilersinnaasut 

Kangerlussuarmi Issittumi tunngaviusumik ilinniagaq inuusuttortatta nunatsinni inuiaqatigiinni upalungaarsimanermut tunngasuni ilinniarfissaattut naleqqussagaagaammat, tassani ilinniarsimasut nunatsinni sakkutooqarfiunngitsuni kingornatigut sulilersinnaapput.

Tassa nunatsinni kingorna soorlu politiinngorniarnissamik qatserisartunngorniarnissamilluunniit periarfissaqalissapput.

Tamannalu Tom Mathæussenip atorluarniarlugu eqqarsaatigaa.

- Politiinngorususinnaavunga aamma soorunami qatserisartoq, taanna oqarpoq.

Tom Mathæussen Issittumi Sakkutooqarfimmi suliffimmik aamma misiliinikuuvoq. Taamaammat Kangerlussuarmi ilinniarfik nutaaq soqutiginartuutippaa. Assi © : KNR

Qinnuteqartunimi oqaloqatigisimasaata ilarpaaluisa nunarput qimannagu ilinniakkamik taassuminnga aallartitsinissamik periarfissaqartitaanertik nuannaarutigigaat, Jacob Hvid oqarpoq.

- Oqaloqatigisama ilarpaaluisa Danmarkiliaqqaanngikkaluarlutik Illersoqarnissaqarfimmi ilinniagaqarsinnaalernertik nuannaarutiginerarpaat, taanna oqarpoq.

Taakku qinnuteqaataat ataatsimiititaliarsuarmi qaammatini aggersuni nalilersorneqassapput. Qinnuteqartut peqqissusaannik misissuinermi paasisat allattariarsornermillu misilitsinnermi angusaat ilinniakkamik aallartitsisinnaanerannik naliliinermi aalaajangiisuussapput.

Qinnuteqareersut amerlanerpaartaat oqaatsitik atorlugit, tassa kalaallisut misilitsittut qinnuteqartunilu angutit arnallu amerlaqatigiittut, Jacob Hvid oqarpoq.

Illersornissaqarfik ilinniakkami tassani ukiumut ataasiaannarluni ilinniartoqalertassaaq. Taamaammat Kangerlussuarmi Issittumi tunngaviusumik ilinnialernissamik qinnuteqarsimasuni maajimi aallartittussaanngitsortaat aappaagu aallartinnissamik qinnuteqaqqikkaluarsinnaapput.

Nutaarsiassami kukkunermik nassaarsimaguit uunga allaffigineqarsinnaavugut.

Aamma atuaruk