Illersornissamik ilinniarfik nutaaq soqutigineqarluartoq

Illersornissaqarfiup Kangerlussuarmi tunngaviusumik ilinniarfiani nutaami 15-iinnaat ilinnialersinnaagaluartut inuusuttut 200-nit amerlanerusut ilinnialernissaminnut qinnuteqarput.

Allattoq Hanna Vestergaard Hviid, Thor Bill

januaarip 08-at 2024 12:41

Illersornissaqarfiup Kangerlussuarmi tunngaviusumik ilinniarfittaassaa soqutigineqaqaaq - uffa suli aallartinnani.

Holdimut ilinnialersussanut nutaanut qinnuteqartut 236-usimapput. Issittumi Sakkutooqarfik taama ilisimatitsivoq.

Aamma atuarukPolitikerit ukiorpassuarni massa akerliusut Upalungaarsimanermik ilinniarfittaami aallartikkusuttorpassuaqartoq

Qinnuteqartuni 165-it ilinnialernissamut atatillugu misilitsitsisoqarmat peqataapput.

Tunngaviusumik ilinniarneq upalungaarsimanermut tunngassuteqartoq, nunatsinni suliffinni arlalinni atorneqarsinnaassaaq, soorlu Kalaallit Nunnaanni politiitut qatserisartutulluunniit ilinniagaqarniaraanni.

Issittumi tunngaviusumik ilinniagaq suua?

Upalungaarsimaneq sakkutuutullu piginnaasaqarneq ukkataralugit ilinniarfik
Ilinniarfik Danmarkip illersornissamut ministereqarfianit 50 millionit koruuninik aningaasalersorneqarpoq.
Ilinniarfimmi ilinniarneq ukiup affaanik sivisussuseqarpoq. Ilinniartut ilinniarnermik ingerlanerata naggataani Danmarkimi Sakkutuuni Imarsiortuniissapput.
Ilinniartut Illersornissamut ministereqarfimmit akilerneqartunik akissarsisassapput, nerisassaqartinneqartassapput inissaqartinneqarlutillu.
Ilinniartutut akuerineqassagaanni silassorissutsimut misilitsissapput. Misilitsissut kalaallit oqaasiinut kulturinnullu tulluarsagaassaaq. Tamatuma kingorna qinnuteqartut ataasiakkaarlutik nalilersorneqassapput, peqqissutsimullu misissortissimasussaallutik.
Ilinniarfimmi naammassineq politiinngorniarfimmut Illersornissaqarfimmilu ilinnialernissamut isissutaasinnaavoq.

Tigusiffik: Issittumi Sakkutooqarfik

Allisiguk

Ilinniakkami holdit maaji qaammat aallartippat aallartittut inuusuttut arfineq-pingasuniit 15-inut amerlassuseqartut kisimik aallartissinnaassasut politikkikkut aalajangerneqareerpoq. Taamaammat inissat pilerngunneqartutut isikkoqalereerput.

Issittumi Sakkutooqarfik ilinniarfittaassaq pillugu nuna tamakkerlugu ukiarmi paasisitsiniaagamik, ilaatigut Ilulissat, Aasiaat, Sisimiut, Nuuk Qaqortorlu tikippaat.

Tamatuma sniatigut piumasunik misilitsitsiortornerminni aamma Maniitsoq, Kangerlussuaq aamma Tasiilaq tikippaat.