Tiilerilaami aallaasersortoq 18-inik ukiulik tigusarineqarpoq, ikiligaasullu Nuummut aallarunneqartut

Nalunaaqutaq 15:30 nutarterneqarpoq:

Kalaallit Nunaanni Politiit Tiilerilaami aallaasersortoqarneranik ullaaq nalunaarfigineqarput.

Angut 18-inik ukiulik nalunaaqutaq aqqanermut tigusarineqarpoq.

Kalaallit Nunaanni Politiit tusagassiuutinut nalunaarummi allapput.

18-inik ukiulik aallaasersunnginnermini ataatsimuualaartuni peqataanissamut itigartinneqartoq, pigaartut pisortaat Carl Sværd oqarpoq.

-Aangajaarniutilinnik imigassartortoqarfiusumit angut 18-nik ukiulik aneqquneqareernermi kingorna utersimavoq aallaammik nassarluni. Qujanartumik matu parnaaqqasoq, Carl Sværd nalunaarpoq.

Politiit suliartik pillugu annerusumik oqaaseqarumanngillat, angulli kamassimasoq najuuffimmit anisitaanermi kingorna uterluni aallaasersorsimavoq. Aallaasersornerulli anisitaasoqarneranik aallaaveqarnersoq erseqqissumik oqaatigisinnaanagu Carl Sværd oqarpoq.  

-Angut aallaasersortoq killisiorneqaqattaassaaq, tamanna suliamut qulakkeerinninniarnermik siunertarqarpoq.

Angut 33-nik ukiulik arnarlu 36-nik ukiulik ikilerneqarput. Angut maanna inuunerminik ulorianartorsiorpoq. Pineqartut nunaqarfimmit Tasiilami napparsimmavimmukaanneqaqqaarput, maannali qulimiguulimmik Kulusuliaanneqarput, Nuummukaanneqartariaqartut timmisartumik King Air-imik Nuummut napparsimmaviliaanneqassasut ilimanartoq, politiit nalunaarput. 

Politiit misissueqqissaarnermut nunaqarfimmilu toqqissisimanermik pilersitseqqinnissamut atatillugu  kommunimi upalungaarsimasut suleqatigalugit Tiilerilaamiikkallassapput.

Danmarkimiit pinerluttoqarsimatillugu misissueqqissaartartut nunatsinni Politiit peqatigalugit maanna suliamut atatillugu misissuileruttortut, Ritzau allappoq. 

Nutarterneqarpoq...