Salik Simonsenip ilinniarfik nutaaq naammassigaa: Ullut ilaat qasunalaartaqaat

Issittumi Tunngaviusumik ilinniarfimmi ilinniartut siulliit ilinniakkami immikkoortuat siulleq, ukiup affaanik sivisussuseqartoq oktobarip 30-anni naammassivaat.

Salik Simonsen ilinniakkamik nutaamik naammassinnittut ilagaat.

- Misigisaq nuannerunartittarakku, aamma misilittagaqarusukkama nutaanik, taanna toqqarsimavara  qaffassarusullunga arlaannik misilittakkanik, taanna KNR-imut oqarpoq.

Kalaallit inuusuttunit 18-init 25-nut ukiullinnit sakkutuunngorniarfimmi ilinniakkamik aallartittunit 22-nit 19-it naammassipput.

Taakku ilinniarnerminni ikiueqqaarneq, sakkutuutut piginnaasat, ikuallattumik qamiterineq imarsiornerlu ilaatigut ilinniarfigaat.

- Sakkutuut qanoq suleriuseqartarnersut taavalu nutaat soorlu sakkutooqatit naapikkaanni paasereerlugu qanoq suleqatigiissanerluta tamakkua assigiinngitsut ilinniarpagut. Aamma atortukujuit qanoq atornissaat ilinniarpagut, Salik Simonsen oqarpoq.

Danmarkimi sorsuttuusaartut

Issittumi Tunngaviusumik Ilinniarneq Kangerlussuarmi kisimi pinngilaq.

Salik Simonsenip Danmarkimi sungiusariarnermi ilaat oqaluttuaraa.

-  Soorlu asulimigooq sorsuffimmiippugut, taava unnuilluta assaalluta, qamaffissaliorluta assingiinngitsorpassuit suliaralugit taanna nuannerpoq tiguartisimanarpoq. Qasunalaaginnartarpoq ulloqartarami taamannak, taanna oqarpoq.

Seqqortaarassi?

- Ulloq kingulleq HRO-rtut saassuppaatigut taava uagut imminut illersorpugut tassani. Taanna nuannernerpaavoq misigisanni, Salik Simonsen apeqqummut anngaajutigaluni oqarpoq.

Naak Issittumi Tunngaviusumik Ilinniarneq naammassigaluartoq atuartut arlallit ingerlaqqinniarput. Taakkunannga arlallit sapaatip akunnerani matumani pujorsiortutut qatserisartutullu akunnerni 148-ni sungiusarput. Assi © : KNR / Gaaba Olsen

Arlallit ilinniakkaminnik ingerlaqqinniartut

Atuartunit 19-init naammassisunit 17-it sakkutuutut ilinniarnerminnik ingerlaqqinnissaat naatsorsuutigineqartoq, Issittumi Tunngaviusumik Ilinniarfik paasissutissiivoq.

Atuartut siunissamut angorusutaqangaatsiarput. Salik Simonsen aamma angorusutaqarpoq. Taassuma imarsiortuuneq ukiuni arlalinni suliffigerusuppaa, immaqalu aamma sakkutuutut.

- Qiniinnarsinnaagatsigu qaffassarfissarput sorliussanersoq, taava qaffassarnitsinni aamma nuussinnaagatta akuerisaagutta.

- Taava ilimanarsinnaavoq nooqattaarlunga misilittaarujoortunga uannut tulluartumik, taanna oqarpoq.

Aamma illit sakkutuunngorniarusukkuit Issittumi Tunngaviusumik Ilinniarfiup aammaarluni aappaagu maajip qaammataani sakkutuunngorniarnissaq periarfissiissutigeqqissavaa.