Nuummi mittarfittaarsuup ammaanersiornerani: Tamulugassat oqalugiaatillu tulleriiaatiinnavipput

Nuummi mittarfittaarsuup illorsuaata isaariaani ulluinnarpalaartuugaluartumi ammaanersiorneranut immikkut qaaqqusat amerlanerit assuarput. 

Immikkut qaaqqusat ilaat saqqarmioqarput.

Nunatsinni inuit nuimasortaasa ilarpassui timmisartorsuup Tuukkap Nuummi nunnerngaarnissaanut akunnialuinnanngortut kateripput. Assi © : Nicole Sander / KNR

Nunatsinni inuit nuimasortaasa ilarpassui Nuummi mittarfittaarsuup illorsuaani kateripput. Naalakkersuisut siulittaasuat Múte B. Egede, Inatsisartut siulittaasuat Mimi Karlsen, Sulisitsisut pisortaat aamma Issittumi Sakkutooqarfiup pisortaa aamma generalmajoriusoq qungujulallutik oqalorusaarput.

Mittarfissualiornermi siuttuusoq Jens R. Lauritsen suliniutip naammassineranik qularnanngitsumik nuannaarutigalugu qungujulanerpaasunut ilaavoq.

Nuummimi mittarfittaarsuaq sisamanngornermi ammaanersiorneqarpoq, taamaalillunilu timmisartunit nunanit allaneersut nunniffigineqarsinnaanngorluni. Nuummi mittarfittaarsuaq angallannermut tunngasuni qullersaqarfiup sisamanngornermut unnuaani akueraa.

- Oqarpungami, Greenland Airportsip pisortaa Jens R. Lauritsen tusagassiortutta ilaat inuppassuit akornanniittoq qissimillu oqarpoq.

- Uperisariaqaratsigumi, taanna aamma oqarpoq.

Tamarmik Tuukkamik takuniaasut

Qilanaarisaaqisorlu ualikkut ataatsip kingorna tassa nalliinnaqaaq.

Timmisartorsuummi Tuukkap Sermitsiaq qulaakkaa ungasianiit takussaalaarpoq. Tassamersuaq nunniliinnaqaaq, mittarfittaarsuullu illorsuaata inersuartaani ilua pisorpalukkunnaariartorpoq.

Inuillu isikkiviginnersiorrallutik eqiterupput.

Immikkut qaqqusat tamarmik Tuukkap nunnerngaarneranik takuniaallutik igalaat saavannut eqiterupput. Assi © : Nicole Sander / KNR

Annakkuummillutik anersaammerrattut

Minutsialunnguit qaangiuttut 'Arj, arj, arj'-eertorlutik nillerrapput.

Tuukkaq mittarfittaarsuaq qulaavaavaariarlugu kujammukarpoq. Kingunitsiannguagulli tassa nalunaaqutaq 13.20 nunnimmat takuniaasut nuannaarnerup pianik nillerrapput, Jens R. Lauritsenilu eqqissiallappoq.

Inuit eqitaarrattarniarlutillu ersaartaapput. Ukiut tallimat matuma siornalimi qilanaarisaq nallinnaaqaaq.

Inuit eqqissiallarrattut malunnarpoq, aamma kingornatigut oqalugiaatini. Timmisartorsuarmi ilaasut nioreerlutik mittarfittaarsuup illorsuaanut isaaneranni nillerfigineqallattaarput, ersaartaanneqallattaarput siorpalullunilu.

Siorsorpaluttoq 2.klassertut tikittunut tikilluaqqusisuni saarlersaasuusut aappalaartuaqqanik aalataartitsineranneerpoq.

- En, to, tre, Múte B. Egede tikittuni kingullerpaajulluni iseriartortoq anngummat nilliavoq hurraartuutilerlutillu:

- Hurra, hurra, hurra.

- Ulloq nuanneq, tassa siunissamut periarfissarpassuarnik imalimmut massakkut ikaarsaarsinnaanngorpugut, Múte B. Egede KNR-imut kingorna oqarpoq.

Nersualaarinninnavissuaq

Danmarkip aningaasaqarnermut ministeria Nicolai Wammen ammaanersiornermi oqalugiaateqartorpaalunnut ilaavoq.

- Killitsikkumanngikkaanni qaarsutut, soorlu maani qaartitigaasimasutut, ittuusariaqarpoq, Nikolai Wammen oqarpoq.

Taanna oqalugiartilluni timmisartorsuarmik Nuup mittarfissuanut nunnerngaaqqammersumik tikittut ilaat højtalerikkut saaffiginnittarfiliaqqusisoqarneranit akornusersorneqariataarmat, tamanna soorlu tassa aaqqissuussamut ilaasussaannartut ippoq, tassami mittarfittaarsuup atuutilerneranik ersersitsilluinnarmat.

Nersualaarinnilluni oqalugiaateqartoqaalunnerani seqqorpallattoqallattaavoq.

Ammaanersiornermut immikkut qaaqqusat imeruersaatissanik tamulugassanillu sassaallerfigineqarput. Assi © : Nicole Sander / KNR

Assigiinngitsorpaalunnik ammaanersiornermut immikkut qaaqqusanut tamulugassaqarpoq. Assi © : Nicole Sander / KNR

Ammaanersiornerup naammassiartornera ilutigalugu inuerukkiartorpoq.

Tassalu Kangerlussuarmut aqqusaaqqaartarnerit Tuukkap Nuummi mittarfittaarsuarmut nunnerngaarnerani oqaluttuaannanngorput, nunattali oqaluttuarisaanerani kapitali nutaaq malunnartinneqarluni.

Oqalugiaateqartummi oqaasii naapertorlugit tassa taamaappoq.