Katersortarfimmi nallittorsiortut: Illoqarfimmi nuannattoqartoq
Nuummi illoqarfiup qeqqa nalunaaqutaq 13.06-inngortoq unippoq.
Katersortarfiup eqqaani inuit malarlutik qummut isiginnaarrapput.
- Aajinnga, aajinnga, ataaseq qilammi qaserlunilu tungujortumi qaamaneq sakkortooq tikkuarlugu suaartarpoq. Taamaalillunilu qiimmatsattoqarpalullunilu ersaattaattoqarpoq, Air Greenlandimiillu Tuukkaq illoqarfik kaajallallugu timmivoq, taamaaleriarlunilu Nuummi Mittarfimmut siullermeertumik milluni.
Taamaalillunilu Nuummiit Københavnimut timmisartukkut toqqannartumik aqquteqalerpoq.
Katersortarfimmi kaffillertoqarpoq. Silamili aamma nuannattoqarpoq, inummi nillertumut arpallutik aninikuupput. Katersortarfimmi KNR TV-mit timmisartup minnissaa toqqaannartumik aallakaatinneqartoq isiginnaarneqarpoq, toqqaannartumilli aallakaatitsineq tassanngaannartumik attaveeruppoq, isiginnaartinneqartorlu qernertuinnanngorluni.
Katersortarfiup iluani Nora Petrussen Gelsskov 19-inik ukiulik saftimik tungujortumik imerfinnut igittakkanik sassaalliuteqarpoq, taannalu ullumikkut nuannaaqaaq.
- Qiimanartorujussuuvoq. Inuit nuannaarput, taanna oqarpoq, qungujorujussuarlunilu.
- Angalanissamummi maanna periarfissarparujussuanngussapput. Angalanissaq ajornaannerulissaaq, ungasinngitsumilu New Yorkimut toqqannartumik angalasinnaanngussalluta. Uanga arlaanni aamma New Yorkiliassaanga. Qularnanngilaq.
Jens Lindskjold 39-nik ukiulik aamma nuannaarpoq. Taanna DMI-mi sulisarpoq, qaammatillu arlalikkaarlugit Nuummiittarluni.
- Atlantikoq qulaallugu mittarfiup ammarneqarnera pissutigalugu illoqarfiup tamarmi nalliuttorsiorpalaarnera tupinnaannartumik nuannerpoq, taanna oqarpoq.
- Uanga aamma maanngarlunga tamanna misigiartorpara. Ulluinnarni silassamik suliaqartarpunga, DMI-llu Air Greenland qanimut suleqatigisarpaa. Mittarfimmut atatillugu silassamik nalunaaruteqartarpugut, taamaammat timmisartumut silassamullu tunngasut tamarmik uanga nuannaraakka.
Taassuma silap ullumikkut qanoq innissaa ernumassutigilaarsimagaluarpaa, silali timmisartornissamut ullut arlallit pitsaassusut ilimasaarutigineqarpoq. Kisianni:
- Persilerlunilu putsilerpat qanoq innissaata takunissaa pissangagaara. Taamami pisoqarumaarpoq, taanna oqarpoq.
Kangerlussuaq maqaasissaviuk?
- Ukiukkut 25-nik issinnerata kiinnakkut malugisarnera maqaasisasvara. Kisianni aamma aasakkut seqinnarillunilu 20-nik kiattarnera tamanna nuannertarpoq. Tamanna maani Nuummi qaqutigut nalaattarparput. Kisiannimi toqqannartumik timmisartorsinnaaneq ajornaannerullunilu periarfissaginneruvoq.
Augusta Danielsen 52-inik ukiulik.
- Nuannerpoq assut imaattoq angalasarluni Danmarkimut soorlu kangerlussuakkooqqaartaratta taava tulliani angalalerutta Danmarkimut kangerlussuarmukaqqaarnata Danmarkimukassagatta iluassaaq nuanneq, taanna oqarpoq.
Marianne Berthelsen, 61-inik ukiulik:
- Nuummiuuvunga, eqqarsaatigaaralu meeraagallaratta maani taamaallaat qulimiguuleqarpoq. Maannakkullu – ukiut amerlavallaanngitsut qaangiummata – timmisartorsuit mittalerput. Tupinnaqaaq. Illoqarfimmi allanngorujussuartoqarmat tamanna uannut pingaaruteqarpoq.
Ludvig Fleischer 60-inik ukiulik katersortarfimmut aamma kaffisoriartorpoq.
- Nuannaarnarpoq aamma inuit allat nuannaarmata assut nuannerpoq nuannaarutigaarput tikimmat, taanna oqarpoq.
- Tassami periarfissat kusanartorujussuanngorunarput akisuallaanngikkuni.
