Amerikami præsident Donald Trumpip, Kalaallit Nunaat Issittorlu pillugit isumaqatigiissutissamut tunngavissanik pilersitsisoqarnera pingasunngornermi unnukkut nalunaarutigimmagu, Kalaallit Nunaanni, Danmarkimi USA-milu politikikkut uivernerujussuaq allannguuteqaqqippoq.  

Tamanna taassuma Nato-mi generalsekretærimik Mark Ruttemik Schweizimi Davosimi World Economic Forumeqarneranut atatillugu oqaloqateqarnerani pivoq. Donald Trumpip tamatuma saniatigut oqalugiarnermini Kalaallit Nunaat pissaaneq atorlugu tiguniarnagu oqaatigaa.

Siunissamut isumaqatigiissutissamut sinaakkutissat qanorpiaq ilaqarnersut tamanit suli ilisimaneqanngilaq.

Danskilli ministeriunerata, Mette Frederiksenip (S) Kunngeqarfik Danmarkip namminersortuuneranik tunniussisoqaranilu tunniussisoqanngitsoq erseqqissaatigaa.

KNR-ip Naalakkersuisut siulittaasuat, Jens-Frederik Nielsen (D) oqaaseqartinniarsaraa, tamannali suli iluatsinngilaq.

Kisianni Nunanut allanut Sillimaniarnermullu Ataatsimiititaliap siulittaasua, Pipaluk Lynge (IA) KNR-imut ima oqarpoq:

- Oqaloqatigiittoqarnera nuannaarutigaara. Kisianni isumaqatigiissuteqartoqarnissaanut peqataanissarput naatsorsuutigaara, oqaatigiuartuarparpummi peqataatinnata pilluta isumaqatigiissuteqartoqassanngilaq.

Oqaloqatigiinneq neriuuteqalersitsisoq

Pipaluk Lyngep Trumpip nunatsinnik tiguaanissamut pissaanermik atuiniannginnera eqqaavaa. Ernumaneq innuttaasut akornanni qaammammi kingullermi pingaartumik initusimasoq taassuma oqaatigaa.

- Oqaloqatigiittoqarnissaa naapeqatigiinniarnissarlu neriuutissaqalersitsipput, kisianni suli nalileruminaappoq.

Taassuma parteqataata Folketingimi ilaasortap, Aaja Chemnitzip pissutsit maanna aamma annikinnerulaalersorai.

- Amerikamiut tungaaniit aaqqiagiinngissutaasumi annikilliisoqalaartitsinerput pitsaasuuvoq, kisianni alloriarnernik arlalinnik siuaqqalaartuarnissarput pingaaruteqarpoq.

- Imminermiippoq Kalaallit Nunaat oqaluuserigaangatsigu Kalaallit Nunaat soorunami peqataajuaannassaaq, taanna KNR-imut oqarpoq.

Pingasunngornermi nutaarsiassap kingorna neriuuteqarneruit?

- Soorunami qasukkaamiartoqalaarsinnaavoq, kisianni Trump naatsorsuminaatsorujussuusoq takusinnaavarput. Taamaammat taama amerlatigisut nalunaarutigineqarneranni amerlasuut tamanna qasussutigaat, Aaja Chemnitz oqarpoq.

Pissutsit utaqqimisaarai

Siumumi siulittaasup, Aleqa Hammondip isumaqatigiissuteqartoqarnera pillugu nutaarsiassat suli oqaaseqarfigerusunngilai.

Taassuma nunatta, Danmarkip USA-llu akornanni Washingtonimi sapaatip akunnerata siuliani isumaqatigiissutaannit suleqatigiissitamit nutaamik saqqummertoqarnissaa utaqqivaa. Ataatsimiinnermi tassani nunanut allanut ministerit pingasut, Vivian Motzfeldt (S), Lars Løkke Rasmussen aamma Marco Rubio aamma Amerikamiut præsidentiata tullersortaa, J.D. Vance ataatsimiipput.

Atassutip siulittaasua, Aqqalu Jeremiassen assinganik aamma nalunaaruteqarpoq. Taassuma isumaqatigiissutip imarisaa pillugu pisortatigoortumik annikitsortalersorneqartinnagit oqaaseqarfigiuminaatsut KNR-imut oqaatigaa.

Naleraq: Eqqissiallaataasinnaavoq

Illuatungiliuttut partiiata Naleqqap siulittaasuata isumaqatigiissutip imarisaa suli aamma ilisimanngilaa.

Taassumali isumaqatigiissut nunatsinnut misigissuseqarfiungaatsiartumi oqallinnermullu ajornakusoortumut toqqissiallaataalaarsinnaanissaa neriuutigaa.

- Neriuppunga tamanna (nunatsinni oqallinnermi aaqq.) eqqissisimanerulersitsilaarlunilu kalaallinut eqqissisimanerulersitsilaassasoq, taanna KNR-imut oqarpoq.

KNR-ip aningaasaqarnermut naalakkersuisoq, Múte B. Egede saaffigaa. Taassumali suli uterfigeqqinngilaatigut.