Orla Joelsen: Politikerit qujamasunnerat tulluusimaarnarpoq
Jens-Frederik Nielsen (D), Múte B. Egede (IA) og Kim Kielsen (S) Nuummi USA-mut akerliussutsimik takutitsinermi ingerlaaqatigiipput.
Taakku ingerlaarnerminni angut ilisarnartoq qeqqisimasoq qiviarpaat.
Suaartoqarpallappoq:
- Orla, qujanaq!
Angut tassaavoq Orla Joelsen. Taassuma USA-mut akerliussutsimik takutitsinerup siulia aaqqissuuppaa.
Naallu taanna nunatsinni sammineqangaatsianngikkaluarluni taassuma eqqunngitsumik paasissutissiinerit akerlilersorpai nunarpullu pillugu Amerikamiunut saqqummiisarluni.
Politikerillu maluginiaasimanerat nuannaarutigaa.
- Tulluusimaarnarpoq, paasivara aamma Facebookimi immaqalu X-imi ikkuttakkakka assigiinngitsutigut maluginiarneqarsimasut.
Amerikamiunut paasititsiniaaneq
Taanna inoqatinut attaveqaatikkut Amerikamiorpassuit atortagaanni nunatsinnilu atugaanerpaanngitsumi ilungersuussisimavoq.
Orla Joelsen inoqatinut attaveqaatikkut X-ikkut 80.000-inik malinnaasoqarpoq.
Taannalu nunanit tamalaanit tusagassiortunit Nuummiittunit ulluni kingullerni aamma maluginiarneqarpoq
- Kalaallit Nunaanniit aammalu Kalaallit Nunaata avataaniit sapaatip-akunnerata siuliani saaffiginnittorparpassuupput, messengerikkut aamma X-imi indbakkikkut, aammalu mailikkut telefonikkullu aamma saaffiginnittut. Ilaannikkullu aamma soorlu illoqarfimmi neriartoraangama ilisarineqarsimallunga ornittarpaannga apersorusullunga, kisianni massakkut killilernikuuakka.
Orla Joelsenip naalakkersuisut tusagassiuutinut nalunaarutaat, tusagassiortunik katersortitsinerit, KNR-imi Sermitsiamilu ilanngutassiat imarisaat ilaatigut siammartertarpai.
Tamatuma saniatigut oqaaserineqartut pingaartumik Amerikamiunit politikeriniillu Donald Trumpimut taassumalu Kalaallit Nunaannik piginninnissamut anguniagaanut tapersersuisut akerlilersortarpai.
KNR-ip Orla Joelsen januaarip 20-anni oqaloqatigaa. Taanna Donald Trumpip unitsinneqarnissaanut Kongressimut ullormi tassani kaammattuuteqarluni saqqummiivoq.
- Ullaaq manna takuara massakkumut 564.000-t sinnerlugit takuneqareersimalersoq, taavalu X-imi 300-t sinnerlugit siammarterneqarsimalluni.
Trumpip unitsinneqarnissaa anguniagaasoq
KNR-ip Orla Joelsen inuit Donald Trumpimut akerlioreersut kisimik inoqatinut ataveqaataani malinnaasuunersut aperimmani tamanna akerlilerpaa.
- Saaffiginnittartut Trumpimut akerliusuinnaanngillat, aamma ikkussanni kommenterertartuni tapersersuisoqarpoq, pingaartumik Amerikaminngaanniit, tamanna maluginiartarpara.
Maannamummi tamaannga killinnerit eqqarsaatigalugu qanoq neriuuteqarpit?
- Tassa soorunami neriuutigilluinnarpara Trumpip nunatsinnik tiguaarusunnini siorasaarininilu unitsissagaa, tamanna kissaatigisorujussuuara.
Taama saqqummertarninni sunneeqataasimanissat neriuutigaat?
- Neriuppunga sunniuteqaqataasimassallunga pingaartumik uani X eqqarsaatigalugu.
