Arnap Trump, Epsteinimut tunngasumik saqqummiusseqqittoqarnerani, pasilleraa

USA-p inatsisinik atortitsinermut ministereqarfiata Epsteinimut tunngatillugu allakkat isertuunneqarsimasut sisamanngornermi saqqummiuppai.  

Allakkat taakkua ilaat tassaavoq arnap FBI-mit 2019-imi killisiorneqarsimasup, USA-p præsidentianik Donald Trumpimik kinguaassiuutitigut ilaatigut atornerluisarsimasutut unnerluutiginninneranik, oqaaseqaatai naalisakkat.

Karoline Leavittip, præsidentip illorsuata oqaaseqartartuata, pasilliinerit tusagassiuutinut Politicomut tassaanerarpai "paatsuuinerit tunngavissaqanngitsut uppernarsaatinik tutsuiginartunik tunngaveqanngitsut“.

Arnap Trumpimit milukaartinniarneqarsimalluni killisiorneqarnermini oqaluttuaraa.

Tamanna 1980-ikkunni, arnaq taamani 13-it 15-illu akornanni ukioqarallarmat, pivoq.

Arnaq kinguaassiuutitigut pinerluttartumit maanna toqoreersumit Jeffrey Epsteinimit, præsidentinngortussamut New Yorkimi New Jerseymiluunniit tamanna sioqqullugu ilisaritinneqarsimavoq.

Kukkusumik ilisarnaasersuineq

Tusagassiuutit arlallit, sisamanngornermi nalunaarutip saqqummiunneqarnissaa sioqqullugu allaaserereersimavaat, allakkiaq piusoq imarisaali oqaatigineqarsinnaanngitsoq.

Killisiuinerimmi allattorsimaffiat tamanut saqqummiunneqareermat.

Killisiuinerulli naalisarneqarnera suliami Epsteinimut tunngasumi allagaatit millionilikkaat tamanut saqqummiunneqartut akornaniinngilaq.

Epsteinilli suliaanut atatillugu inatsisinik atortitsinermut ministereqarfiup allakkat millionillit saqqummiussimasaasa ilaannut killisiuinermit naatsumik nalunaarusiaq ilanngunneqarsimanngilaq.

Ministereqarfik inoqammut attaveqaammi X-imi, allagaatit takkua 15-it sisamanngormat saqqummiunneqartut, "kukkusumik assilisatut ilisarnaatilerneqarsimasut“ allappoq - taamaattumillu tamanut  saqqummiunneqarsimanngitsut.

Allagaatit Epsteinimut tunngatillugu paasiniaasoqarneraneersut, eqqartuussiveqarnermut ministereqarfimmit tamanut saqqummiussassat, ministereqarfimmit qanoq passunneqarsimanerat Kongressimit sammineqaleruttortoq, sisamanngornermi saqqummiussisoqarpoq.

Demokratit ministereqarfik allagaatinik Trumpimut tunngasunik isertuussiniarnerarpaat. USA-mi Repræsentanternes Husip ataatsimiititaliaata, USA-p inatsisinik atortitsinermut ministeria Pam Bondi, suliaq pillugu nassuiaateqaqqullugu aggersarneqarnissaa taasissutigaa.

Inatsisinik atortitsinermut ministereqarfiup, allagaatit Epsteinimut tunngasut qaammatini kingullerni saqqummiunneqanngikkallarmatali, allagaatit "Donald Trump pillugu salluliuutinik tupaallatsitsiniaanermillu imaqartut" nalunaarutigaa.

Epsteinip peqatigisartagai

Nutaarsiassaqartitsiviup Reutersip arnap unnerluutiginnissutai attuumassuteqanngitsumik uppernarsarsinnaanngilai.

FBI-p nalunaarsugaatai naapertorlugit, arnaq taanna politiinit 2019-imi oqaloqatigiunnaarneqarpoq.

Epstein niviarsiaqqanik ukiukitsunik tuniniaasarsimasutut 2008-mi eqqartuunneqarpoq. Qaammatini 13-ini parnaarussaaqqavoq. Ukiukitsunik isertorluni nunamut eqqussisarsimasutut atornerluisarsimasutullu juuli 2019-imi unnerluunneqarpoq. Parnaarussivimmi aggustimi 2019-imi toquvoq.

Trump Epsteinip  peqatigisartagaasa ilagigaat ilisimaneqarluarpoq. Præsidentip Epstein ukiorpassuit matuma siorna attaveqarfigiunnaarnerarpaa.

/ritzau/Reuters