SIK: Suliffeqarfiit avatangiisiisa pitsaasuunissat nukissaqartinngilarput
Sulisartulli pingaarnertuitaat tassaanerupput akissarsiat, taama oqarpoq sulisartut kattuffianni, SIK-mi siulittaasoq, Jess G. Berthelsen.
- Pissutsit taamaatsillugit soorunami aamma aalisakkerivinni tunniussimasinnaaneq soorunami aamma killeqartorujorujussuussaaq, ataatsimut tassa tamakkua peqqutaasinnaapput, siulittaasoq oqarpoq.
Piffissap sivikitsunnguup ingerlanerani aningaasanik amerlasuunik akissarsiaqarnissaq sulisartunit pingaarnerutinneqarpoq, tassa taakku nalusaramikku qaqgu angerlartitaassanerlutik taamatullu suliffissaarutissanerlutik.
- Aningaasaq salliutillugu eqqarsaatigisarpaat, tassami ukiumut isertitassat eqqarsaatigalugit soorlu ilaatigut taamaallaat ukiumut qaammatit arfinillit arfineq-marluk atasuinnarmik sulisinnaasarpoq, SIK-p siulittaasua, Jess G. Berthelsen oqarpoq.
Aamma atuaruk Aalisakkerivinni avatangiisit misissoqqissaarneqalersut
Immikkut ilisimasalik misissuissaaq
Aalisartut atugaat taamatullu aalisakkerivinni sulisut atugaat pillugit aatsaat taama annertutigisumik misissuisoqartussanngorpoq. Suliffeqarfiit avatangiisii pillugit misissuisussaq tassaavoq, suliffeqarfiit avatangiisii pillugit immikkut ilisimasaqartoq nakorsaaneq, Kurt Rasmussen.
Taassuma misissuinermini paasissallugu ilimagineruaa, aalisakkerivinni sulisut ajutoortarneri nalunaarutigineqarsimasunit amerlanerujussuusinnaaneri. Tamanna pillugu Kurt Rasmussen ima oqarpoq.
- Ullumikkut ilisimasat aallaavigalugit ajutoornerit amerlanerujussuusinnaaneri tupaallaataasussaassaaq, nakorsaaneq, Kurt Rasmussen oqarpoq.
Taassumalu taama nalunaaruteqarnera, sulisartut kattuffianni siulittaasup, Jess G. Berthelsenip nuannaarutigaa aamma nuannaarutigialugu suliffeqarfiit avatangiisiisa misissorneqartussanngorneri.
- Nalinginnaasumik sullivimmi isumannaallisaaneq pillugu misissuisoqarnikuunngilaq aatsaat iluamik misissuisoqalerpoq, taamaattumik tamatsinnut pissanganarpoq, qanoq inissisimasoqassanersoq, Jess G. Berthelsen KNR-imut oqarpoq.
Sulisartut aamma akisussaaffeqarput
Suliffeqarfiit avatangiisii pillugit inatsimmi, ukiuni qulini maannamut Nunatsinni aamma atuuttumi allassimavoq, suliffeqarfiit avatangiisi sulisitsisunit kisimi akisussaaffigineqanngitsoq aamma sulisartut tamassumunnga akisussaasuusut allassimalluni. Aamma inatsimmi allassimavoq suliffeqarfiit avatangiisiisa akornutaat sulisartunit nalunaarutigineqartarnissaat piumasaqaataasoq.
- Tassa aatsaat massakkut misissuisoqalerpoq, taassumalu misissuinerup takutikkumaarpaa aalisakkeriviit eqqarsaatigalugit qanoq inissisimasoqarnersoq, Jess G. Berthelsen oqarpoq, nangillunilu, suliffeqarfiit avatangiisiisa, timimut tarnimullu pitsaasuunnginneri pissutaallutik sulisartut suliartunngitsortarmata, soorlu aalisakkerivinni tamanna takornartaanngitsoq.
