Aalisakkerivinni avatangiisit misissoqqissaarneqalersut
Sullivinni isumannaallisaaneq eqqarsaatigalugu Kalaallit Nunaat nunaavoq tamakkunannga ilisimasaqarfiunngitsoq.
Aamma atuaruk Suliffeqarfinni sulisunut pissutsit Sullivinnik nakkutilliisoqarfiup misissuiffigilerai
Suliamut avatangiisinullu tunngatillugu nakorsaq taama oqarpoq, taassuma maanna Nunatsinni sulliviit annersaanni avatangiisini ajornartorsiutit misissuiffiginialerpai, tassalu aalisiarnerup iluani ajornartorsiutit.
Kalaallit Nunaanni aalisarnerup iluani ilisimatuutut misissuineq annertooq aallartinniarlugu Kurt Rasmussen oqarpoq; taamaattumillu Kalaallit Nunaanni tamarmi sullivinni ajornartorsiutaasartut tamaasa ataatsimut isiginiartariaqartut.
- Sullivinni annertuumik nukersorfiusut aallartiffigaakka. Avataasiutini aamma sullivinni atugassarititaasut tarnikkut ajornartorsiortitsisinnaapput. Aammami tamakkunaniinneq tarnikkut atugassarititaasunut sakkortusinnaapput.
Suliffeqarfissuit pingasut peqataassapput
Kurt Rasmussenip misissuinerani Polar Seafoodimi, Royal Greenlandimi Halibutimilu sulisut peqataatinneqassapput.
Suliffeqarfissuit aalisakkanik imarmiunillu suliarineqartartut tamangajaasa suliarisarpaat, saniatigullu avataasiutinik annertuumik pigisaqarlutik. Suliffissuaqarfiit avataasiutillu 50-it sinnerlugit sulisullit misissuinermi taamaallaat peqataatinneqassapput.
Sulisorineqartut 1000-it misissuinermi peqataatinneqassapput. Akiugassanik immersugassaqassaaq, akissutaasullu ilaat Dronning Ingridip napparsimmavissuani misissoqqissaarneqarumaarput.
- Ilimagilluinnarparput aamma amiluummik eksemeqartoqartassasoq, anersaartornermullu aqqutini astmaqartunik assigisaannillu peqarluni. Astma nappaataavoq ilungersunartoq katsorsaatinik ikiorserneqarsinnaasoq. Ullumikkut imaannguatsiarpoq inuit astmaqaleraangamik soraaginnartartut allanillu suliffittaarlutik. Taamali aaqqiineq pitsaasuunngilaq.
Aqqaneq marluugaangata ataaseq eqqugasarpoq
Kisitsisit 2008-meersut ersersippaat Nunatsinni suliffissuaqarnermi - imaappoq annerusumik aalisakkerivinni - inuit aqqaneq marluugaangasa ataaseq sullivimmi ajutoornermik eqqorneqartartoq. Tassa Danmarkimi inuussutissaleriffinni ajutoortarnernit pingasoriaammik amerlatigisut.
- Eqqarsaruttali sullivinni ajutoornerit ilaannamininngui kalerriutigineqartartut, Nunatsinni aalisarnerup iluani suliffissuaqarnermi ajutoornerit amerlanerungaarsinnaasut Kurt Rasmussen oqarpoq.
Kalaallit Nunaanni sullivinni ajutoortarnerit suliamillu pissusilinnik nappaateqalersarnerit pillugit pissutsit piviusut ullutsinni tassaavoq ajornartorsiut kimilluunniit ilisimaneqarani:
Kalaallit Nunaat inuttoorsuunngilaq killilinnillu sulisussaqarluni. Danskit tungaanniit ikiuussimanngilagut. Uagut sulianut avatangiisinullu tunngasunut immikkut ilinniagaqarsimasugut siusinnerusukkut sulilersimassagaluarpugut.
Suliamut avatangiisinullu tunngatillugu nakorsaq Herningimi Nunap immikkoortuani Napparsimmavimmi speciallæge Kurt Rasmussen taama oqarpoq.
