USA-p Danmarkimi aallartitaa atorfininitsinneqarnermiiniit qaammatit qulit qaangiummata akuerineqartoq
Amerikap præsidentiata Donald Trumpip Danmarkimi aallartitartaassatut innersuussaa Ken Howery, amerikamiut senatianiit akuerineqarpoq.
Taamak 49-nik ukiulik niuertoq pilersitsisartorlu inoqatinut siammarterivimmi X-imi allappoq.
- Danmarkimi aallartitassatsitut senatimit unnummut akuerineqarama tulluuppunga maniguullungalu.
- Nunarput sinnerlugu sulinissannut aamma USA-p Danmarkillu akornanni ikinngutigiinnerat nukittooq ineriartorteqqissallugu qilanaarpunga, taanna allappoq.
KNR-ip tusarpaa, aallartitaq nutaaq sapinngisamik sukkanerpaamik Kalaallit Nunaat Savalimmiullu tikeraarniarai.
Kalaallit Nunaat ukkataralugu
Donald Trumpip Howery Danmarkimi Amerikap aallartitassaatut decembarimi 2024-mi toqqarpaa. Sulilernissaminulli senatimiit akuersissummik peqqaartariaqarsimavoq.
Trumpip Howery toqqaramiuk, ilaatigut Sverigemi USA-p aallartitaatut atorfeqarnikuusoq, Trumpip Kalaallit Nunaata aqulernissaa pigilernissaalu pillugit eqqarsaatini ilanngullugit oqaatigai.
- Nunami sillimaniarneq nunarsuarmilu kiffaanngissuseqarneq eqqarsaatigalugit USA-p Kalaallit Nunaannik piginninnissaa aqutsinissaalu pingaaruteqarluinnartoq, Donald Trump tusagassiisarfimmini, Truth Socialikkut allappoq.
Ilutigalugu allaqqavoq, “Keni USA-p soqutigisaanik sinniisutut sulilluarumaarpoq”.
Ken Howeryp Danmarkimut qaqugu tikissanersoq erseqqissumik allaqqanngilaq.
Sumi aamma najugaqarnissaa ilisimaneqanngilaq. Politiken naapertorlugu, Københavnimi Strandvejenimiittoq illussaarsuaaraq, amerikap aallartitaata ukiorpassuarni najugaqarfigisartagaa nutarterneqarpoq.
PayPal-mafiami ilaasortaasoq
Alan Leventhali præsidentiusimasumit Joe Bidenit toqqarneqarnikuusoq, USA-llu Danmarkimi aallartitaatut juuli 2022-miit ukioq manna januaarip tungaanut atorfeqartoq, Howeryp paarlappaa.
Kisianni Donald Trump USA-p præsidentiatut januarimi ivertinneqarmalli Danmarkimi aallartitatut atorfik inuttaqarsimanngilaq.
Nutaamik præsidentinngortoqartillugu aamma amerikamiut siunnersortaalersussat nutaanngoraangata, aallartitat tamakkerlutik taarserneqartarput.
Ken Howery aningaasarsiornermik ilisimasalittut ilinniarsimasuuvoq, Texasimeersuulluni niuertuullunilu pilersitsisartuuvoq.
Nunarsuarmi akiliinermut atortumik PayPalimik ilaatigut aallarniisooqataavoq, Teslamik aallarniisoq Elon Musk peqatigalugu. New York Times naapertorlugu taakkua marluullutik ikinngutigiipput.
Børsen naapertorlugu, Ken Howeryp aningaasaatai pisortatigut nalunaarsorneqanngillat, avisili naapertorlugu tusagassiorfiit arlallit 1,5 milliarder dollariussangatippaat. Tassa 9,6 milliardit koruunit missaat.
New York Times inunnik Ken Howerymik ilisarisimannittut januaarimi oqaluussaqarput, taakkualu sapiiserumatuutut ilisimasassarsiortutullu oqaatigaat.
Tusagassiorfik naapertorlugu, pingaartumik Danmarki soqutigisaralugu, ilaatigut Kalaallit Nunaat pillugu isumaqatiginninniarnissamut periarfissaqarnera tunngavigalugu, ikinngutini oqaluttuussimavai.
