Kommune Qeqertalik pisortaanertaartoq

Kommune Qeqertalimmi kommunalbestyrelsip Alida C. Rafaelsen pisortaanertut toqqarpaa.

Kommunimi borgmesteri, Simigaq Heilmann (D), tusagassiuutinut nalunaarummi taama allappoq.

- Alida sulinermigut ilungersuussillaqqissuuvoq, aamma kommunimi pisortaanertut misilittagaqarluarmat Kommune Qeqertaliup ineriartorteqqinnissaanut suleqatigiilereernerput aallartilluareersoq nangeqqinnissaanut qilanaarlungalu toqqissisimavunga, Simigaq Heilmann (D) oqarpoq.

Alida C. Rafaelsen juunimiilli kommunimi pisortaagallarsimavoq, tamatumalu saniatigut Kommune Qeqertalimmi allattoqarfimmi pisortatut naatsorsuuserinermillu pisortatut atorfeqarsimavoq.

Alida C. Rafaelsen atorfittaarnini pillugu tusagassiuutinut nalunaarummi ima oqarpoq:

- Suliassat anguniakkallu imaannaanngitsuusinnaasut pissanganartullu, kommunimi immikkoortuni tamani sulisut amerlasuut peqatigalugit aallartinnissaannut qilanaarpunga, Alida C. Rafaelsen oqarpoq.