Qeqqata Kommuniata avinneqarnissaa amerlanerussuteqartunit akuersissutigineqartoq
Qeqqata Kommunia avillugu Sisimiut Maniitsorlu tamarmik immikkut kommuninngussanersut isummerfigisassanngorlugu kommunimi innuttaasut taasinissamut ippassaq periarfissinneqarput.
Innuttaasuut taasiartortut 71 procentiisa siunnersuummut akuersipput, 28 procentii naaggaartut.
Taasiartortut amerlagisassaanngitsut
Kommunilli innuttaasuisa affai ataallugit kisimik taasiartorput, tamannalu borgmester Malik Berthelsenip taasinernik kisitsereernermi Sisimiut TV-anni ippassaq pingasunngornermi apersorneqartilluni malugaattaaq.
Taasisinnaasut 6583-iusut 44 procentingajaat kisimik taaseqataapput.
Aaqqissuussaanikkut isikkuani allannguuteqassanngitsoq
Taasinerlumi kommunip aaqqissuussaanikkut isikkuani allannguinissamut tunngaviussaanngilaq.
Innuttaasut kommunit kattutinnginneranni kommunip aaqqissugaasimaneranut uteqqikkusunnersut, Innuttaasut taasinerat Inatsisartunut qinikkat aalajangiiumaarnissaannut sammivissiisutut atussavaat.
Qeqqata Kommuniani taasisut amerlanerussuteqarluartut kissaatigisaattut avinneqassappat, tamanna - Sisimiut TV-annit oqaatigineqartutut - kommuninut 2029-mi qinersinernut atatillugu aatsaat pisinnaavoq.
Allannguutit Inatsisartunit suliarineqassapput
Inatsisartut inatsisiliornermikkut kommunit qanoq agguagaassanersut aalajangersartarpaat.
Kalaallit Nunaata nunap immikkoortuinut kommuneqarfinnullu aggorneqarnera pillugu Inatsisartut inatsisaat naapertorlugu kommunit maanna tallimaapput, tassaallutik Kommune Kujalleq, Kommuneqarfik Sermersooq, Qeqqata Kommunia, Kommune Qeqertalik kiisalu Avannaata Kommunia.
Allannguisoqassappallu, tamanna Inatsisartut inatsisiliornerisigut aatsaat pisinnaavoq.
Naalakkersuisoqatigiit kommunit avinneqarsinnaanerat pillugu suliniutit ingerlareersut nangittumik suliarissagaat, Demokraatit, Inuit Ataqatigiit, Siumup Atassutillu naalakkersoqatigiinnissamik isumaqatigiissutaanni allasimavoq.
