Zelenskyj: Eqqisseqatigiinnissamut pilersaarut ukiuni 15-ini USA-p isumannaallisaanermut qularnaveeqqusiinissaanik imaqarpoq
Ukrainep Ruslandillu akornanni eqqisseqatigiinnissamut pilersaarusiornissamut siunnersuusiami, Amerikamiut Ukrainep ukiuni 15-ini isumannaallisaanermut qularnaveeqquteqarput.
Nutaarsiassaqartitsivik Reutersip paasissutissiinera naapertorlugu Ukrainep præsidentia Volodymyr Zelenskyj ataasinngornermi tusagassiortunik oqaloqateqarnermini taama oqarpoq.
Ukiut 50-it tikillugit isumannaatsuunissamik neriorsuuteqaqqullugu USA-p præsidentia Donald Trump qinnuigisimallugu Zelenskyj nangilluni oqarpoq.
- Ukiuni 30-ni, 40-ni 50-iniluunniit atuuttussamik isumaqatigiissuteqarusullunga oqarfigaara (Trump, aaqq.), Zelenskyj nutaarsiassaqartitsivik AFP naapertorlugu allappoq nangillunilu:
- Præsidenti tamanna eqqarsaatigiumaarlugu oqarpoq.
Eqqisseqatigiinnissamut pilersaarut qitiutinneqartoq
Trumpip Zelenskyjillu Ukrainemi eqqisseqatigiinnissamut pilersaarut 20-nik imikkoortortalik ilaatigut qitiutillugu, Trump Floridap nunaataani Mar-a-Lagomi sapaatiummat nalunaaquttap-akunnerini arlalinni ataatsimeeqateqareersorlu, taama nalunaaruteqartoqarpoq.
Ukrainemi sorsunneq unitsinniarlugu siuariaateqarluartoqartoq, USA-p Ukrainellu præsidentiisa ataatsimeeqatigeereernerup kingorna oqaatigaat.
Qanorli siuariaateqartoqarnersoq suli erseqqinngilaq, soorlutttaaq eqqissinissamik isumaqatigiissuteqarnissaq qanoq ungasitsiginersoq ilisimaneqanngitsoq.
Ruslandip Ukrainellu akornanni eqqissineq ataavartussaq anguniarlugu isumannaallisaanikkut qulakkeerinninnerup pingaaruteqarneranik isumaqatigiittoqarsimasoq, Zelenskyj ataatsimiinnerup kingorna ilisimatitsivoq.
Eqqisseqatigiinnissamut pilersaarut pillugu innuttaasunik taasisitsinissaq
Eqqissinissamut pilersaarut 20-nik immikkoortulik Ukrainemi innuttaasunit taasissutigineqartariaqartoq, ataasinngornermi Zelenskyj oqarpoq.
Taamatut taasititsisoqassappat minnerpaamik ullut 60-it sakkuaattoqanngittoqartariaqartoq, Zelenskyj oqarpoq.
Aammattaaq Ukrainep præsidentia naapertorlugu eqqissinissamut pilersaarut Ruslandimit, Ukrainemit, USA-mit Europamillu atsiorneqartariaqarpoq.
Aamma „ulluni aggersuni“ Ukrainep illoqarfiisa pingaarnersaanni, Kyivimi, Europami Amerikamilu atorfilittat ataatsimeeqatiginissaat kissaatigaa.
Aamma Europami siuttut januaarip aallartinnerani ataatsimeeqatigiumaarlugit uppernarsaavoq.
Frankrigimi præsidenti Emmanuel Macron inoqatinut attaveqaatini X-imi sapaatiummat unnukkut aamma taama allappoq.
Nunat Ukrainemik tapersersuisut ataatsimeeqatigissasut tassani allassimavoq. Nunat tamarmik immikkut Ukrainep isumannaatsuunissaanut qanoq tapersiisinnaanerinik paasiniaanissaq siunertaavoq.
/Ritzau/
