Nuummi atuarfinnik matusineq: Nerisarfiit allaffiillu atuartitsivissatut

Nuummi suliffeqarfiuteqarpit? Nerisarfiuteqarpit imaluunniit inimi atunngitsuuteqarpit, pinasuartumik atuartut iserterfigisinnaasaannik?

Taava Kommuneqarfik Sermersuumi Siumut gruppia isumaqarpoq, oqoqarnera pissutigalugu ullormiit ullormut atuarfinnik matusisariaqarnermi, atuartitsivissaaleqinermi aaqqiissutaasinnaasunut ilaasoqarsinnaasoq.

Taama partiini gruppit tusagassiutinut nalunaarummi pingasunngornermi ullorornerani allapput.

- Meeqqat atuartut atuarnissaat pingaartillugu, meeqqallu angajullerni misilitsittussat suliffeqarfinnut ingerlalerumaartussallu pillugit, suliffeqarfinnut saaffiginnissutigerusuppagut suliffeqarfissinni aaqqiissutissaqarussi peqataaqqullusi, gruppi allappoq.

- Immikkuullarissumillu pisoqarnerani immikkuullarissumik iliuuseqarsinnaaneq ataatsimoorullugu aaqqiissutissaqarnissamik ujartueqatigaatsigit. Meerartavut siunissami suliffeqarfinnut ingerlaqqittussaapput, taakkulu aamma misileraasarput suliffeqarfinni sulillutik.

Nalunaaqutaq issarpoq

Nuup atuarfiini inissaaleqinerpaafissaminiippoq. Atuarfik Ukaliusaq oqoqarnera pissutigalugu matoqqammerpoq. Atuartut illoqarfimmi sumiiffinni assigiinngitsuni atuartinneqarput klassillu agguataagaallutik, taamaalillutik nikerartumik atuartinneqartarlutik.

Atuartut ullaap tungaani imaluunniit ualinerani atuartinneqartarput.

Siumut naapertorlugu, ajornartorsiutip tullia takkutingajalerpoq. Tassami ‘piffissaq apeqqutaaginnalerpoq’, ASK-ip natuneqarnissaanut, taakku allapput. Taamaattumik Nuummi suliffeqarfiit atugassiisinnaanissaannik kaammattorpaat – pingaartumik atuartunut angajullernut, upernaamut misilitsittusanut.

- Inersimasut suleqataarusuttut pisariaqartippavut, Siumut allappoq.

Oqoqarneq pissutigalugu atuartitsivissaaleqinerup saniatigut, atuarfittaassap illoqarfiup qeqqaniittup siorna atulertussaagaluartup suli atulerneqannginnera pissutaavoq. Qaqugu atulerneqassaneranik suli ulluliisoqarnikuunngilaq.

Kingusinaarneranik pisortatigoortumik nassuiarneqarnera tassaavoq, illorsuarmi ikuallattoqarnissanut sillimanermut tunngasunik suli ajornartorsiuteqartoqartoq.

Nunanit allanit modulinik sanaartugassanik nassiussisoqarsinnaanersoq kommunip misissoraa, Kommuneqarfik Sermersuumi borgmesteri Avaaraq Olsen (IA) tv-kkut apersorneqarnermini oqaatigaa. Taassumali qaqugu qanorlu annerusumik oqaaseqarfiginngilai.

Tamatuma kingorna borgmesterip Qanoruumi oqarnini oqaaseqaateqarfiginissaa kissaatiginngilaa.