SIK-mi ilaasortat tamarmik akissarsiaqarnerulissapput

SIK-mi ilaasortat akissarsiaat ataatsimut isigalugu 8 procentinik qaffapput. Ilaasortat ilinniarsimasut akissarsiaat qaffanerpaasut ilinniagaqarsimanngitsut qaffaaviginikinnerpaapput.
SIK-p siulittaasuata Jess G. Berthelsenip isumaqatigiissut iluarisimaarpaa. Assi © : KNR / Malik Brøns
septembarip 15-at 2022 12:53

SIK-mi ilaasortat pisortat suliffeqarfiutaanni sulisut akissarsiaqarnerulissapput.

Sulinermik Inuussutissarsiuteqartut Kattuffiata Namminersorlutillu Oqartussat illua-tungeriillutik sulisartut sulinerminni isumaqatigiissutissaat naammassivaat. Ilaasortat ilinniagaqarsimasut akissarsiaat qaffannerpaassapput ilaasortallu ilinniagaqarsimanngitsut akissarsiaat qaffannikinnerpaassallutik.

- Uani isumaqatigiissimavugut, aammalu  ataatsimeersuarnermi taanna akuersissutigineqarpoq, tassalu ilinniarsimasut matumani isumaqatigiissuteqarnermi annertunerusumik tunineqassasut. Maannakkut ilinniarsimanngitsortagut sukkasuumik ilinniartinneqarnissaat aamma isumaqatigiissutigaarput, Sulinermik Inuussutissarsiuteqartut Kattuffianni, SIK-p siulittaasua Jess G. Berthelsen KNR-imut oqarpoq.

Immikkoortortani pisortat qaammammut akissarsiaasa 6.000 koruuninik qaffannissaat isumaqatigiissutigineqarpoq.

Tassa imaappoq, SIK-mi akissarsiat nalingi ataatsimut isigalugu 8 procentinik qaffattut, illuatungeriit nalunaaruteqarput. Pitsaanerulersitsinerit ataatsimut katillugit 128,2 millionit koruuninik naleqarput.

AAMMA ATUARUK SIK Namminersorlutik Oqartussallu akissarsiat pillugit isumaqatigiissuteqartut

SIK-mut ilaasortat ilinniarsimanngitsut akissarsiaat qaffaaviginikinnersaapput.

- SIK-p ilaasortai ilinniagaqarsimanngitsut nalunaaquttap akunneranut koruunit 100-it missaannik tunngaviusumik akunnermusiaqarput. Taakkua saniatigut 3 koruunimik qaffariarlutik ukiup marluk qaangiuppata akunnermusiat 3 koruunimik aamma qaffaqqissapput, Jess G. Berthelsen oqarpoq.

Taakkua saniatigut SIK-mi ilaasortat sulisut tamarmik erninerup nalaani akissarsiatik paariinnarsinnaalerpaat. Ilaasortat sapaatit akunnerini 18-ini akissarsiaqaannarlutik naartunermut erninermullu atatillugu sulinngiffeqarsinnaatitaasimasut maanna sapaatit akunnerini 40-ni akissarsiaqaatigalugu sulinngiffeqarsinnaalissapput.

- Kattuffimmiit pingaartissimasarput aamma tassaavoq erninerup nalaani kikkut tamarmik aningaasarsiaminnik tigumminniinnarnissaat, matumani uani aamma ilinniarsimanngitsut ilanngullugit pineqarput, Jess G. Berthelsen oqarpoq.

Apriilimiit akissarsiat qaffaataat tunniunneqassapput

Ilinniarsimasut soorlu isumaginninnermut ikiortit aamma peqqinnissamik ikiortit atorfitsik aqqutigalugu ukioq allortarlugu sulinngiffeqarnermut atatillugu angalanissamut akiliunneqartalernissaat aamma isumaqatigiissutigineqarpoq.

Taakkuli qaqugu tunniunneqarnissaat suli inissivinngilaq.

Akissarsiat qaffaataat kingumoortumik apriilip aallaqqaataaniit tunniunneqartussaapput. Taakku oktobarimi kingornaluunniit tunniunneqarumaarput.

SIK-mi ilaasortat akissarsiaannut isumaqatigiissut martsip 31-anni naammassereerneqarsimasussaagaluarpoq. 

SIK-p Namminersorlutillu Oqartussat SIK-mut ilaasortat 6.900-t missaanniittut sulinerminni isumaqatigiissutaat 20-t missaanniittut septembarip pingajuanni isumaqatigiissutigaat.

  • SIK-mi isumaqatigiissutit malillugit atorfeqartut meerartaarnermi kingorna sulinngiffeqarnerminni tamakkiisumik akissarsiaqarsinnaapput. Arnat SIK malillugu atorfeqartut sapaatini akunnerni 18-ini sulinngiffeqarsinnaatitaasaraluarput. Taakku manna sapaatini akunnerni 40-ni tamakkiisumik akissarsiaqarsinnaatitaalissapput.
  • SIK-mi ilaasortat inoqutigiittut atorfininnerminni angalanissaminnut akiliunneqarsimasut soraarniuteqarnerminni angerlarnissaminnut akiliunneqartalissapput.
  • Qanigisaasup pinartumik nappaateqarnerani imaluunniit toqukkut qimagunnerani kiffaanngissuseqarluni akissarsiaqartitaanissaat siusinnerusumik pisalissaaq.
  • Qaammammusialittut atorfeqartunut ilaqutaasunullu akiliunneqarluni angalanissamut, sulinngiffeqarluni angalanissamut akiliunneqarnissamut aningaasaateqarfimmik immikkut pilersitsiffigineqartussamut tapiissuteqarfigineqartalernissaanik periarfissiisoqassaaq.
  • SIK-mi ilaasortat pisortanilu sulisitsisut tapit soraarnerussutisiaqaataasinnaasut amerlineqarnissaat qitiutissimavaat. Tapit suut pineqarnersut allassimanngilaq.
  • Tunngaviusumik akissarsiat SIK-mi ilaasortanut tamanut pitsaanerulersinneqarput. Tassani pineqartut ilagaat nunaqarfinni peqqinnissaqarfimmi sulisut, isumaginninnermut ikiortit, arnarsiat, talittarfinni mittarfinnilu sulisut assigisaallu akissarsiatigut immikkut qaffaavigineqarput.