Peqqinnissaqarfimmi sulisunut isumaqatigiissut: Akissarsiat qaffasinnerusut ukiumullu ajunngitsorsiat

Peqqinnissaqarfimmi sulisunut isumaqatigiissutissaq illuatungeriit isumaqatigiissutigaat, angusallu maanna saqqummiunneqarput. Isumaqatigiissut maanna akuerineqanngikkuni itigartitsissutigineqartussanngungajalerpoq.

Allattoq Birgitte Kjeldsen

aggustip 06-at 2025 14:40

Nutserisoq Connie Fontain

Naqqiissut: Ilanngutassiami uani siuliani allappugut, nunatsinni peqqinnissaqarfimmi sulisut sirna aprilimiilli isumaqatigiissuteqaratik sulisut. Tamanna eqquilluanngitsuuvoq, isumaqatigiissutimmi atuuttup qaangiuffissaani atorunnaarsinneqanngilaq. Tassunga ilanngullugu peqqissaasut peqqinnissaqarfimmi sulisut isumaqatigiissut nutaanngitsoq 2020-meersoq atorlugu qaammatit 15-it sinnerlugit sulipput.

Nunatsinni peqqinnissaqarfimmi peqqissaasut, timimik sungiusaasut, pillorissaasut sulisullu allat qaammatit 15-it sinnerlugit isumaqatigiissuteqanngillat. Isumaqatigiinniarneq kiisami naammassingajalerpasippoq.

Isumaqatigiinniarnermimi angusat sapaatip akunnerata aallartinnerani atsiorneqarput, sulisullu peqatigiiffiinut PPK-mut ilaasortaasunut nassiunneqarluni.

Pappiaqqami isumaqatigiinniarnermi immikkoortut pingaarnerpaat allassimapput. Isumaqatigiinniarnermi aalajangersimasumik tassani atorfeqartunut akissarsiassarinnerutitsinissaq ukkatarineqarpoq.

Aamma atuarukPeqqinnissaqarfimmi sulisut suli nutaamik isumaqatigiissuteqanngitsut: - Tatiginninnermut innarliineruvoq

Tamanna Peqqissaasut Kattuffiani siulersuisut ilaasortaminnut nassiussaanni erseqqissaatigineqarpoq.

Peqqissaasut tunngaviusumik akissarsiaasa qaffanneqarnissaat, tapit qaffanneqarnissaat, utoqqarnut sulinngiffeqartitsisarnerup atuutilersinneqarnissaa, tunngaviusumik akissarsiat 9 procentiinik ukiumut ajunngitsorsiaqalernissaq ilaatigut naatsorsuutigineqarsinnaasoq, PK mailimi allappoq.

Taartaasuttaaq piareersimasuunerminni suliffiillu nikinganerinut pitsaanerusumik akilerneqartalertussanngussapput.

Peqqinnissaqarfimmi sulisunut isumaqatigiissut nutaaq

Isumaqatigiissut 2024-mi apriilip aallaqqaataanit 2028-mi septembarip 30-at ilanngullugu atuutissaaq.
Tunngaviusumik akissarsianut, atorfimmut tapinut, piffissani nalinginnaasuunngitsuni sulinermi tapinut, piareersimasuunermut tapinut, sumiiffigisamut tapisianut, kisimiilluni sulinermut, attassiniarnermut tapinut qaffaanerit tamarmik 2024-mi apriilip aallaqqaataanit atuutilersinneqassapput. Tamatumalu saniatigut ullumikkumut naleqqussarneqassapput.
Isumaqatigiissut atorfeqartunut pisortatut akissarsiaqanngitsunut ukiumoortumik ajunngitsorsiassaqartitsinermik atulersitsinissamik ilaatigut ilaqarpoq.
Isumaqatigiissut 2026-mi akissarsiat immikkoortuinut aaqqiissut aamma ilaavoq, tassanilu aamma utoqqarnut sulinngiffeqarnerit aamma atuutilersinneqassallutik.
Isumaqatigiinniarnermi angusat naapertorlugit sinerissami sulisut sumiiffik apeqqutaatillugu tapiissuteqarfigineqassapput.

OK24 pillugu isumaqatigiissutigineqartut PPK-p nittartagaani nammineq misissuataarsinnaavatit.

Isumaqatigiinniarnermi PPK-p ataani sulisut peqatigiiffiini arfineq-marlunni ilaasortat isumaqatigiissutip nutaap tamakkiisumik saqqummiunneqarluni paasissutissiissutigineqarnissaanut ataatsimiigiaqquneqarnissaat tullinnguuppoq. Tamatuma kingorna isumaqatigiissut nutaaq ’aappi’-mik ’naamik’-milluunniit taasissutigineqassaaq.

Taasititsisoqarnerata suliarineqarnerata erngertumik aallartinneqarnissaa, peqqissaasut kattuffiata ilaasortaminut mailikkut erseqqissaatigaa.

Aamma atuaruk Siulittaasoq: Peqqinnissaqarfimmi sulisussaaleqineq kingunipiloqarpoq

- PK-mi siulersuisut tamakkiisut angusat akuerineqarnissaat innersuussutigigaat, mailimi aamma allassimavoq.

Taasineq ullut 20-t sinnerlugit sivisussuseqassaaq, tamannalu naammassippat inernera saqqummiunneqarumaarluni.

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.