Savalimmiormiut: - Statoil gassimik uuliamillu nassaanngilaq
Statoilip Savalimmiuni qillerilluni misileraanermini uuliamik naammattoorsisimaneranik Savalimmiuniit nunanillu allanit tusartakkat tunngavissaqarunanngillat.
Tusarfiit oqarput, uuliamik tamaani naammattoorsisoqanngitsoq.
Savalimmiuni uuliasiortoqarnera pineqartillugu, Savalimmiuni aviisi, Sosialurin, tutsuviginarluartuusoq, ippassaq unnukkut ilisimatitsivoq, uuliamik gassimilluunniit Statoil naammattoorsisimanngitsoq.
Savalimmiuni qillerilluni misileraasoqarnerani, DONG-ip aamma peqataaffigisaani, isumalluarneq anneruleraluarpoq, Norgemi aviisit ilaata allaaserimmagu, Stena Dons uuliasiortut qillerivianni qilleritilluni uuliamik eqqugaqarsimasoq.
Qillerineq sapaatip akunnera ataasip missaa qaangiuppat naammassissaaq, uuliamillu naammattorsisoqarnissaa taamaammat suli immaqa neriuutigineqalaarsinnaagaluarpoq.
Statoil ukiut arfinillit kingulliit tallimassaa qilleraluni uuliasioraluarpoq. Siusinnerusukkut misiliisimasut tassaapput BP, Shell aamma massakkut misileraasoq, Statoil. Savalimmiuni maanna misileraaneq massakkut immaqa aamma iluatsissanngikkaluartoq, suliffeqarfissuit allat misiliinissaminnik qinnuteqaataat isumaqatigiissutaareerpoq.
BP aamma Shell Anardaco aasaru qillerilissapput. Italiamiullu suliffeqarfiussuat, ENI, Savalimmiunilu suliffeqarfik Faroe Petroleum 2008-mi 2009-miluunniit aamma misileraassallutik.
