Assi: Agnieszka Ruminska/Flickr

Savalimmiut: Sambandspartiip Folketingimut qinigaatitaqarnissaa ilimagineqartoq

Savalimmiuni qinersisartunik isumasiuineq naapertorlugu partii talerperliusoq Sambandspartii Folketingimut qinigaatitaqartussatut ilimagineqarpoq. Partiillu taperlerliit pingasut qinigaasut aappaattut inissinnissartik ilungersuutigaat.

Savalimmiuni tusagassiorfik, Kringvarp, suliffeqarfiup Lóðurip qinersisartunik isumasiuinera tunngavigalugu taama allaaserisaqarpoq.

Sambandspartii aqagu pingasunngornermi qinersinermi 27,7 procentinit taaguunneqassangatinneqarpoq.

Tamannalu eqquutissappat, partiip Folketingimi ilaasortaatitaqarnini 2015-imi annaasani utertissinnaavaa. Edmund Joensen taamani qinigaaqqinngitsoorpoq.

AAMMA ATUARUK Sivisunerusumik pillaasoqartarnissaa politikerit kissaatigaat - tamannali iluaqutaanngitsoq ilisimatuut oqaatigaat

Sambandspartiip Venstre suleqatigaa Lars Løkke Rasmussenilu ministeriuninngortussatut tapersersorlugu.

Savalimmiunit Folketingimi qinigaasussap aappaanut partiit naligiittupilussuarmik inissisimapput.

Qinersisartunik isumasiuineq naapertorlugu Savalimmiuni socialdemokraatit partiiat, Javnaðarflokkurin, 22,1 procentinit taaguunneqassangatinneqarpoq. Sjúrður Skaale partii sinnerlugu Folketingimi ullumikkut ilaasortaavoq, Mette Frederiksenilu tapersersorniarlugu partii neriorsuisimavoq.

AAMMA ATUARUK Folketingimut 2015-imi qinersinerup kingorna nunatsinnut aalajangersagarpassuit akuersissutigineqarput

Avissaarniaqatigiit partiiat, Tjóðveldi – aamma Republikanerinik taaneqartartut – 23,6 procentinit taaguunneqassangatinneqarpoq. Magni Arge partii sinnerlugu Folketingimut ullumikkut ilaasortaavoq. Partiili  ministeriunertut kina tapersersorniarlugu siumoortumik tikkuaanianngilaq.

Aamma liberalkonservativit partiiat, Fólkaflokkurin, 22,8 procentinit taaguunneqassangatinneqarpoq. Partiip Lars Løkke Rasmussen minsteriunertut tapersersorpaa.

Isummersuutit

#FQ2019

Aaja Chemnitz Larsen, folketingskandidat for Inuit Ataqatigiit, afgiver sin stemme til Folketingsvalget i Godthåbshallen i Nuuk. Foto: Christian Sølbeck. (Foto: Christian Klindt Sølbeck/Ritzau Scanpix)

LIVE: Aki Mathilda Høegh Dam aamma Aaja Chemnitz Larsen Folketingimut qinigaapput