Assi: Blogtrepreneur/Flickr Creative Commons

Isumaqatigiinngissutaasoq: Sivisunerusumik pillaasoqartarnissaa politikerit kissaatigaat - tamannali iluaqutaanngitsoq ilisimatuut oqaatigaat

Kinguaassiutitigut kannguttaatsuliortut sakkortunerusumik pillarneqartarnissaat Folketingimut qinigassanngortittut amerlanersaasa piumasaraat. Kannguttaatsuliortunulli tamanna sunniuteqarpianngilaq - naaggaluunniit, ilisimatusartoq oqarpoq. Taarsiullugulu kinguaassiutitigut pinerluttuliortunik katsorsaanerunissaq ujartorpaa.

Sivisunerusumik pillaasarnissaq KNR-ip qinigassanngortittunik pingasunngormat unnukkut oqallitsitsinerani sammineqarpoq.

Ilaatigullu Demokraatit Folketingimut qinigassanngortitaata Steen Lyngep nunatsinni pinerluttulerinermi inatsisip pisoqalivallaarsimanera oqaatigaa.

Pinerluttummi inissiisarfimmiinnermi kingorna sapinngisamik sukkanerpaamik inuiaqatigiinnut uternissaa inatsimmi tunngavigineqarpoq - aamma pinerluuteqarsimasut inuiaqatigiinnut ilaalerseqqinneqarnissaannik taaneqartartoq.

AAMMA ATUARUK Qarmap, ungalup, parnaarsaatillu iluannut parnaarunneqarneq

- Pinerluttup ilaqutariinni pilersuisooqqilernissaa anguniarlugu angerlarsimaffimmut sukkanerpaamik utertinnissaanik eqqarsaat pisoqaavallaarpoq. Sakkortuumik pinerluuteqarsimaneq meeqqanillu kinguaassiutitigut atornerluineq apeqqutaatinneqarneq-ajorput. Pinerluttuliortumut kinguneqartussaavoq, peroriartornermini ajornartorsiuteqarsimagaluarpalluunniit.

Pineqaatissiisarnermut malittarisassat kikkunnit aalajangersarneqartarpat?

Nunatsinni inatsisinik atuutitsinermut suliassaqarfik Folketingimit akisussaaffigineqarpoq.
Taamaammat nunatsinni pinerluttulerinermi inatsimmut allannguutissat Folketingimit akuersissutigineqartussaapput.

Pinerluttup, assersuutigalugu meeqqamik kinguaassiutitigut atornerluisimasup, qanoq sivisutigisumik  inissiisarfimmiitinneqarnissaa pinerluttulerinermi inatsimmi aalajangersarneqarpoq.


Naalakkersuisulli tassaapput inatsisiliornerup allanngortinneqarnissaanik danskit naalakkersuisuinut Folketingimullu noqqaassuteqartussat.

Pinerluttup, assersuutigalugu meeqqamik kinguaassiutitigut atornerluisimasup, qanoq sivisutigisumik  inissiisarfimmiitinneqarnissaanut malittarisassanik politikkikkut aalajangersakkanik ullumikkut peqanngilaq. Pinerluutigineqartullu suussusia tunngavigalugu politiit inassuteqaateqartarput.

Nunatsinni pinerluttulerinermi inatsimmi, assersuutigalugu kinguaassiutitigut pinerluutinut pillaatissanut killiliussat aalajangersagaapput, tassungalu allannguutissat Folketingimi akuersissutigineqartarput.

Inuit Ataqatigiinneersup Aaja Chemnitz Larsenip sivisunerusumik pillaasoqartalernissaa aamma kissaatigaa, pinerluttulli pinerluuteqarsimasunut inissiisarfimmiitinneqarnerminni katsorsarneqarnerusarnissaat aamma kissaatigaa.

- Pinerluttuliornerit suulluunniit akuersaarneqarsinnaanngillat. Meeqqamut kannguttaatsuliorneq akuersaarneqarsinnaanngilaq. Pitsaanerusumillu aatsaat katsorsaasoqartassappat sivisunerusumik pillaasoqartalernissaata qulakkeerneqarnissaa suleqataaffigisinnaavara.

Sivisunerusumik pillagaasut pinerloqqittartut

Sakkortunerusumilli pillaasoqaraluarpalluunniit inuiaqatigiinni ajornartorsiutit qaangerneqarnavianngillat, tamannalu aamma kinguaassiutitigut kannguttaatsuliornerit amerlassusaannut atuuppoq. Annemette Nyborg Lauritsen, Nuummi Ilisimatusarfimmi lektori, nunatsinnilu eqqartuussiveqarnermik ilisimatusartoq, taama isumaqarpoq.

Sakkortunerusumilli pillaasarnerit pinerluttuliornernik ikinnerulersitsisarnerannut uppernarsaatissaqanngilaq.

- Paarlattuanimmi takusinnaavarput inuiaqatigiinni parnaarussivinni inissat amerlineqaraangata pinerluttuliornerit amerlisartut. Politikerit pinerluttuliornernut iliuusererusutaat allamut saariarfissaqannginnertutullusooq nalilerusuppara, Annemette Nyborg Lauritsen oqarpoq.

Pinerluuteqarsimasut inuiaqatigiinnut ilaalerseqqinneqarnissaat qanoq isumaqarpa?

Pinerluuteqarsimasunut inissiisarfimmiittussanngorlugit pineqaatissinneqartut ikiorserneqarnissaat nunatsinni eqqartuussiveqarnermi tunngavineqarpoq - soorlu assersuutigalugu katsorsarneqarlutik, ilinniagaqarlutik suliffeqarlutilluunniit.

Pineqaatissinneqartut taamaalillutik inuiaqatigiinnut uterunik pinerloqqinnginnissaannut pitsaanerusunik periarfissinniarneqartarput.

Najoqqutarisaq: "Inatsisinik atuutsitsinermut suliassaqarfik nukittunerusoq", Namminersorlutik Oqartussat 2017

AAMMA ATUARUK Qarmap, ungalup, parnaarsaatillu iluannut parnaarunneqarneq

Politikerit pillaatissanik sivitsuerusunnerat Annemette Nyborg Lauritsenip paasisinnaanerarpaa. Pineqaatissinneqarsimasunulli inissiisarfimmut inissinneqartut marluugaangata aappaa siornatigut pineqaatissinneqareersimasuusarpoq.

Aamma pineqaatissinneqarsimasut 18-it 24-llu akornanni ukiullit 70 procentiisa missaat siornatigut pineqaatissinneqareersimasuupput.

- Taakkulu taamaalillutik inuiaqatigiinnit peerneqarallartarput, pinerluttuliortoqartarnerali millisinneqarneq-ajorpoq. Paarlattuaminni parnaarussiviit pinerluuteqarsimasunullu inissiisarfiit 'pinerluttuliortunngorniarfittut' taasarpagut.

Kannguttaatsuliortunik katsorsaasoqarnerussaaq

Suleqatigiissitsisut Folketingimut qinigassanngortitaat Kim Lyberth isumaqarpoq sakkortuumik pinerluuteqartut sivisunerusumik pillarneqartassasut, tamatumunngalu peqatigitillugu illoqarfigisaminnit nunaqarfigisaminniilluunniit nuutsinneqartassasut.

- Pinerluuteqarsimasunut inissiisarfimmiittussanngortinneqarnermik pillaasoqartassaaq, aammali najukkami inuiaqatigiinniikkunnaarsitaasoqartassaaq. Saassussisorisaminnimmi aqaguani naapitsisartut amerlapput. Tamannalu akuerisinnaanngilarput.

AAMMA ATUARUK Personalemangel: Ny anstalt mangler 10 fængselsbetjente

Sivisunerusumik pillaanissaq Partii Naleqqap qinigassanngortitaata Pele Brobergip ajornartorsiutinut aaqqiissutaasinnaasorinngilaa. Pinerluttunillu katsorsaasoqarnerulernissaa kissaatigineruaa.

- Pineqaatissinneqarneq pinerluttut arlaatigut katsorsarneqarnissaannik immini ilaqareertariaqarpoq.

Atassutip Folketingimut qinigassanngortitaa Nikolaj Rosing pillaasarnermut killiliussat ersarinnerunissaat pinerluttuliortullu ataqqinarsiseqqinnissaannut suliniuteqartoqarnerunissaa kissaatigalugu tunngavilersuuteqarpoq.

 

Isummersuutit

#FQ2019

Aaja Chemnitz Larsen, folketingskandidat for Inuit Ataqatigiit, afgiver sin stemme til Folketingsvalget i Godthåbshallen i Nuuk. Foto: Christian Sølbeck. (Foto: Christian Klindt Sølbeck/Ritzau Scanpix)

LIVE: Aki Mathilda Høegh Dam aamma Aaja Chemnitz Larsen Folketingimut qinigaapput