Sulisussaaleqineq: Inissiisarfittaassami paarsisut qulit amigaatigineqartut
Inissiisarfittaassap atulernissaa arlaleriarlugu kinguartinneqartarpoq, maannali tassa ammarneqartussanngorpoq: Nuummi pinerluuteqarsimasunut inissiisarfittaaq juuni aallartilaarpat ammarneqassaaq.
Immikkoortortalli sisamaasut ilaat ataaseq sulisussaaleqineq pissutigalugu atuutilersinneqassanngikkallarpoq.
Inissiisarfimmimi paarsisut qulit suli amigaatigineqarput- tamannalu ilungersunarluinnartuusoq, Danmarkimi parnaarussivinni sulisut kattuffianni - inissiisarfinni paarsisut aamma ilaasortaaffigisaanni - allatsi, René Larsen, taama oqarpoq.
- Ajornartorsiut annertuupilussuuvoq ilungersunarluinnartuullunilu, tamannalu ukiuni marlunni erseqqissaatigisarparput, allatsi oqarpoq.
AAMMA ATUARUK Kalaallini Herstedvesterimi parnaarussani arfineq pingasut nunatsinniilerusuttut
Inissiisarfimmilu ulluinnarni aqutsisup isumaqatigaa.
Inissiisarfittaaq inunnut katillugit 76-inut inissaqarpoq. Taakkunannga 40-t immikkoortortani matoqqasuniipput.
Inissiisarfik sisamanik immikkoortortaqarpoq - ammasut marluk matoqqasullu marluk.
Immikkoortortat matoqqasut ungalulersorlugit kalerrisaarusersorlugillu isumannaallisagaapput.
Inissiisarfik tamarmi 120.000 kvadratmeteriuvoq. Arsaattarfiit 17-it assigalugit.
Inissiisarfik juunip sapaatit akunnerisa aappaanni ammassaaq.
Nuummi pinerluuteqarsimasunut inissiisarfik pioreersoq tamatuma kingorna atorunnaassaaq.
Inissiisarfittaap sanaartornera 400 millionit koruunit missaannik akeqarpoq.
Najoqqutarisaq: kriminalforsorgen.gl
- Ilungersunarpoq, sutigummi tamatigut isumannaallisaasariaqaratta. Tamannalu pissutigalugu immikkoortortaq ataaseq ingerlaannaq ammarneqassanngilaq, Tina Dam oqarpoq.
- Sulisulli amigartillugit sulineq misilittagaqarfigaarput. Taamaammat inissiisarfik immikkoortukkuutaarlugu ammarneqassaaq sulisussallu naammatsippata aatsaat tamakkiisumik atulersinneqassaaq.
Inissiisarfik sisamanik immikkoortortaqarpoq, ammasut marluk matoqqasullu marluk. Immikkoortup ammasup aappaa kingusinnerusukkut aatsaat atulersinneqassaaq.
Qinnuteqartut 56-it - qulingiluat atorfinitsinneqarput
Pinerluttunik isumaginnittoqarfik nutaanik sulisussarsiortaraluarpoq. Qinnuteqaqqusinermilu siullermi qinnuteqartut 56-iupput.
- Ajoraluartumilli qulingiluaannaat ingerlaqqipput, Tina Dam oqarpoq.
Oqaatsillu ajornartorsiutaanerpaajunerarpai.
Pinerluttunik isumaginnittoqarfik danskit naalagaaffiannit oqartussaaffigineqarmat inissiisarfimmi paarsisunngorniarneq danskit oqaasii atorlugit pisarpoq. Kalaallisulli ulluinnarni atorneqartarput. Taamaammat inissiisarfimmi paarsisunngortussat danskisut kalaallisut oqalussinnaalluartariaqarput.
AAMMA ATUARUK Anstalter mangler betjente
Oqaatsilli ajornartorsiutigineqartut ilagiinnarpaat, Parnaarussivinni sulisut kattuffianneersoq René Larsen taama isumaqarpoq.
- Kalaallit Nunaanni Pinerluttunik isumaginnittoqarfiup sulisunik pisariaqartitami pissarsiarinissaat ajornakusoortippaa, aamma atorfeqareersut pigiinnarnissaat ajornakusoortippaa, René Larsen oqarpoq akissarsiatigullu assigiinngissutaasoq pissutaanerarlugu: Kalaallit Nunaanni inissiisarfimmi paarsisup tunngaviusumik akissarsiai 18.300 koruuniupput. Danmarkimilu parnaarussivimmi paarsisup tunngaviusumik akissarsiai 23.000 koruuniupput.
Inissiisarfimmi paarsisunngorniat 16-it
Nuummi pinerluuteqarsimasunut inissiisarfimmi paarsisut katillugit 49-nut amerlassusiligaapput. Inissiisarfimmilu maanna sulisorineqartunit 39-usunit 16-it suli ilinniartuupput. Tassa sungiusaatigalugu sulipput.
- Misilittagaqarpallaanngillat, tamannalu inissiisarfimmi nutaaliaasumi ajornartorsiutinik pilersitsisarpoq, inissiisarfimmiitinneqartut assigiinngitsut tamaasa isumagineqarsinnaasussaammata, Parnaarussivinni sulisut kattuffianneersoq René Larsen oqarpoq.
Inissiisarfimmi paarsisunngorniassagaanni 21-leereersimanissaq meeqqallu atuarfianni soraarummeersimanissaq piumasaqaataavoq.
Ilinniarneq ukiunik marlunnik sivisussuseqarpoq, Nuummilu ilinniartitsisoqartarpoq inissiisarfimmilu sungiusaatigalugu sulisoqartarluni.
Najoqqutarisaq: kriminalforsorgen.gl
- Tamanna immikkoortortanut ammasumut matoqqasumullu atuuppoq. Ilinniagaat amigarput misilittagakippallaarlutillu. Tamannalu naggataagut inissiisarfimmiitinneqartut sulisullu isumannaallisarneqarnerinut tunngatillugu sunniuteqarsinnaavoq.
AAMMA ATUARUK Eskimologip inissiisarfittaassaq siuttuuffigissagaa
Tina Dammili naapertorlugu perulluliortoqarnissaanut ernumassutissaqanngilaq.
- Misilittagalimmik ilaqartinnagit immikkoortortamut matoqqasumut isertinnavianngilagut. Sulisussanik pisariaqartitavut tamaasa pigalugit inissiisarfiup ammarnissaa soorunami kissaatigigaluarparput. Kisianni sapinngilarput, aamma amigartunik sulisoqarluta sulineq misilittagaqarfigaarput, Tina Dam oqarpoq.
Herstedvester Fængselimut piffissami killiligaanngitsumi inissinneqartut inissiisarfittaa immikkoortortaanut matoqqasunut nuunneqassanerlutik nammineq toqqarsinnaavaat. Nuutsinneqarusullutillu nalunaarsimasut maannamut arfineq-pingasuupput.
Kalaallit piffissami killiligaanngitsumi pineqaatissinneqartut katillugit 29-t Herstedvesterimiipput.
