Inissiisarfimmi betjentit amerlanerusut pisariaqartinneqarput

Pinerluttunik Isumaginnittoqarfiup pinerluuteqarsimasunut inissiisarfiup matoqqasup Nuummi ukiaru ammarnissaa ilaatigut pissutigalugu betjentit amerlanerusut pisariaqartippai.
Allattoq Karsten Sommer
februaarip 19-at 2019 10:58
Nutserisoq Connie Fontain

Pinerluttunik Isumaginnittoqarfiup pisortaa, Naaja H. Nathanielsen tusagassiuutinut taama paasissutissiivoq.

Taamaammat betjentimut ilinniarfik pillugu paasissutissiinernik arlariinnik februaarip ingerlanerani ataatsimiisitsisoqassaaq. Paasissutissiinermik ataatsimiititsinerit Nanortalimmi ippassaq aallarnerneqarput illoqarfiillu amerlanerit sineriammiittut tikinneqassallutik.

Paasissutissiinermik ataatsimiititsinissat
Narsami: 21. februar aamma 22. februar ilinniartitaaneq pillugu saqqummersitsinermi (messe) Inuilimi
Nanortalik: 18. februar aamma 19. februar Majoriami
Qaqortoq: 25. aamma 26. februar Majoriami
Paamiuni: 21. februar Majoriami
Maniitsumi: 20. februar Majoriami
Qasigiannguit: 22. februar nal. 12.30 Majoriami
Qeqertarsuaq: 20.februar nal.10.00 Majoriami
Upernavik: 22. februar nal.19.00 Majoriami
Uummannami: 19. februar nal. 19.00 Majoriami
Aasianni: 26. februar nal.14.00 Pilersuisumi
Aamma Nuummi Tasiilamilu pisoqarnissai pilersaarusiorneqarput.

Pinerluuteqarsimasunut inissiisarsimmi betjentinngorniaraanni suut pisariaqarpat?

Assersuutigalugu inuit assigiinngitsut tamarmik oqaloqatigineqarsinnaassapput, killiliisinnaassuseqarneq, nammineersinnaassuseqarneq, sukumiisumik suliaqarsinnaaneq, malittarisassanik ataqqinninneq kiisalu inoqatinut ammasuuneq, pisortaq allappoq.

Pinerluuteqarsimasunut inissiisarfinni betjentinngorniarneq ukiunik marlunnik sivisussuseqarpoq. Ilinniarnerup ilarujussua danskisut ingerlanneqartarpoq pinerluuteqarsimasunullu inissiisarfinni sulinermi kalaallisut annermik atorneqartarluni.

Atorfiit nunatsinni assigiinngitsunut agguataaqqapput. Taamaammat Nuummi, Tasiilami, Qaqortumi, Sisimiuni, Ilulissani Aasianniluunniit atorfinittoqarsinnaalluni.

Pinerluuteqarsimasunut inissiisarfinni betjentinngorniarneq pillugu paasisaqarnerorusuttut paasissutissiinermik ataatsimiititsinermut ornigunnissaat kaammattuutigineqarpoq.