Kalaallini Herstedvesterimi parnaarussani arfineq pingasut nunatsinniilerusuttut
Kalaallit Herstedvesterimi parnaarussat arfineq pingasut Nuummi inissiisarfissamut, namminneq kissaatertik malillugu, upernaaru nuussapput.
Qallunaat aviisiat Kristelige Dagblad taama allappoq.
Kalaallit Herstedvesterimi parnaarussat maanna 29-upput.
Nuunnissamilli kissaateqartut amerlisinnaapput, soorlu aamma kissaatertik allanngortissinnaagaat Danmarkimullu utiinnarlutik.
Nuukkusunnginneq assigiinngitsunik peqquteqartoq
- Angerlarusuttut aallaqqaammut tamatuma missanniisasut naatsorsuutigereerparput. Naatsorsuutigaarpullu ukiuni aggersuni suli amerlanerussasut, apeqqutaalluni utaqqeqqaarusunnersut imaluunniit Danmarkimi suli sivisunerusumik katsorsarneqaqqaarusunnersut, Pinerluttunik Isumaginnittoqarfiup pisortaa, Naaja H. Nathanielsen, oqarpoq.
Nuukkusunnginneq assigiinngitsunik peqquteqarpoq. Ilaat ukiorpassuit Herstedvesterimeereerlutik Danmarkimut atanerulersimapput, ilaallu inissiisarfissap qanoq ittuunera paaseqqaarusuppaat.
AAMMA ATUARUK Inissiisarfissaq maajip naalernerani atorneqalissaaq
- Tamanna paasinarpoq. Soorlu assersuutigalugu katsorsaasumik ilisarisimalersimasamik toqqissisimaffigilersimasamillu oqaloqateqarluartarunik, taanna katsorsaariaaserlu taarsernagit, tamanna ilaasa ingerlatiinnarusussavaat, Naaja H. Nathanielsen oqarpoq.
Herstedvesterimut uteqqinneq
Kalaallit piffissami killiligaanngitsumi pineqaatissinneqarsimasut pineqaatissinneqarnertik Nuummi naammassissanerlugu namminneq qaqugukkulluunniit kissaatigisinnaavaat.
Inissiisarfittaamiilernertilli peqqissimissutigigunikku Herstedvesterimut uterumasinnaapput, taamaaliornissamullu qaammatit arfinillit eqqarsarfissaqarput.
AAMMA ATUARUK Inissiisarfittaassap inissaaleqiffiunissaa aarleqqutigineqartoq
Taava naggataatigut Herstedvesterimiileqqissimagunik nunatsinnut utiinnarumaqqissinaapput, tamatumanili aalajangerneq naggataajussaaq.
Nuummi inissiisarfissaq maajip naalernerani ammassaaq, eqqartuussiviillu Danmarkimut pineqatissiisarunnaassapput.
Inissiisarfiup immikkoortortaani matoqqasumi 40-t inissaqarput ammasumilu 36-t.
